Gazmend Muhaxheri tregon pozicionin e tij për rikthimin e Vjosa Osmanit në LDK dhe garën për udhëheqje

Gazmend Muhaxheri, kryetar i Pejës dhe pjesëtar i Kryesisë së Lidhjes Demokratike të Kosovës, deklaroi se nuk e ka kundërshtuar kthimin e Vjosa Osmanit në radhët e partisë.

Kur u pyet drejtpërdrejt nëse kishte qenë kundër këtij rikthimi, përgjigja e tij ishte e shkurtër: “jo”.

Megjithatë, në vazhdim të bisedës, kur u pyet nëse ky vendim kishte dhënë fryte, Muhaxheri u shpreh se rezultati zgjedhor nuk e dëshmoi një gjë të tillë. Ai shtoi se Vjosa Osmani mbetet një vlerë e madhe, edhe për shkak të qëndrimeve që ka mbajtur gjatë ushtrimit të detyrës së presidente.

Lidhur me mundësinë që ajo të kandidojë për postin e kryetares së partisë, Muhaxheri theksoi se procesi do të jetë i hapur dhe se përgjigjen për këtë duhet ta japë vetë Osmani.

Një muaj më parë, dega e LDK-së në Pejë, nën drejtimin e Muhaxherit, i bëri thirrje kreut aktual, Lumir Abdixhiku, të japë dorëheqjen si një veprim moral pas rezultatit të dobët të partisë në zgjedhjet e 7 qershorit.