Gashi kërkon nga BE-ja krijimin në Hagë të një Gjykate Speciale për krimet në Kosovë

Analisti Shkëlzen Gashi ka ngritur shqetësimin për mungesën e dënimeve në Serbi lidhur me krimet e kryera gjatë luftës në Kosovë.

Ai thekson se, nga 105 masakra të kryera në Kosovë gjatë viteve 1998–1999, në Beograd janë dhënë vendime përfundimtare ndaj pjesëtarëve të forcave serbe vetëm për tri raste: Tërnje, Suharekë dhe Podujevë.

Gashi i ka kërkuar Bashkimit Europian të shqyrtojë krijimin në Hagë të një Gjykate Speciale për krimet e forcave serbe-jugosllave në Kosovë.

Në reagimin e tij, ai nënvizon se 105 masakra kanë përfunduar me vetëm 3 dënime dhe ngre pyetjen se ku ndodhet Gjykata Speciale me seli në Hagë për Serbinë.

Sipas tij, Gjykata për Krime Lufte në Beograd ka dënuar përfundimisht pjesëtarë të forcave policore dhe ushtarake serbe e jugosllave vetëm për 3 nga 105 masakrat e kryera në Kosovë më 1998–1999. Bëhet fjalë për masakrat në Tërnje, Suharekë dhe Podujevë.

Për dy raste të tjera, masakrat në Lubeniq dhe Qyshk, Gjykata e Apelit në Beograd i ka rrëzuar vendimet, ndërsa të dyja çështjet vazhdojnë të zvarriten nëpër gjykata që prej vitit 2014.

Kështu, për 100 nga 105 masakrat e kryera në Kosovë, në Beograd nuk është dënuar asnjë person. Gashi vlerëson se kjo dëshmon dështimin e Gjykatës për Krime Lufte në Beograd.

Ai argumenton se Bashkimi Europian duhej të vepronte ndaj Serbisë agresore dhe jo vetëm ndaj Kosovës viktimë, duke themeluar një Gjykatë Speciale me seli në Hagë për krimet e forcave serbe-jugosllave dhe autorët e këtyre masakrave.

Gashi kërkon gjithashtu përgjigje për arsyen se përse vetëm Kosova ka një Gjykatë Speciale në Hagë, ndërsa Serbia, e cila ka kryer 105 masakra në Kosovë dhe ka dënuar autorët e vetëm 3 prej tyre, nuk ka një gjykatë të tillë në Hagë.

Në Gjykatën për Krime Lufte në Beograd janë shqiptuar dënime vetëm për 3 nga 105 masakrat.

Për masakrën në Tërnje, Rajko Kozlina u dënua më 2019 me 15 vjet burg.

Në rastin e masakrës ndaj familjes Berisha në Suharekë, Radojko Repanović u dënua më 2009 me 20 vjet burg. Slađan Čukarić, Miroslav Petković dhe Milorad Nišavić morën respektivisht 20, 15 dhe 13 vjet burg.

Për masakrën ndaj familjes Bogujevci në Podujevë, Saša Cvjetan u dënua më 2004 me 20 vjet burg. Më 2010, Željko Đukić, Dragan Medić dhe Dragan Borojević u dënuan secili me nga 20 vjet burg, ndërsa Miodrag Šolaja me 15 vjet.