Gara: Familjet e të zhdukurve presin zbardhjen e së vërtetës dhe vendosjen e drejtësisë

Kushtrim Gara, drejtues i Komisionit Qeveritar për Persona të Zhdukur, ka shprehur mbështetjen e tij për veprimet e Policisë së Kosovës dhe të Drejtorisë për Hetimin e Krimeve të Luftës, përfshirë operacionin e zhvilluar së fundmi në Zubin Potok.

Ai ka vlerësuar se puna e institucioneve për hetimin dhe dokumentimin e krimeve të luftës është e rëndësishme për garantimin e drejtësisë ndaj viktimave dhe familjarëve të tyre.

“Çdo veprim i Policisë së Kosovës dhe i Drejtorisë për Hetimin e Krimeve të Luftës, përfshirë aksionin e fundit në Zubin Potok, që synon zbardhjen e krimeve dhe vendosjen e drejtësisë për viktimat e luftës dhe familjet e tyre, e mirëpresim dhe e mbështesim”, është shprehur Gara.

Sipas tij, nismat e tilla ndihmojnë gjithashtu në përmbushjen e të drejtës së familjeve për të ditur çfarë ka ndodhur dhe për të njohur të vërtetën, përveç kërkesës së tyre për drejtësi.

Gara ka theksuar se zbardhja e fatit të personave të zhdukur me dhunë dhe ndëshkimi i përgjegjësve përbëjnë detyrime që kërkojnë angazhim të vazhdueshëm nga institucionet.

“Përcaktimi i fatit të personave të zhdukur me dhunë dhe nxjerrja para drejtësisë e atyre që mbajnë përgjegjësi kërkojnë punë të pandërprerë institucionale”, ka deklaruar ai.

Kryetari i Komisionit Qeveritar ka kujtuar se familjet e personave të zhdukur kanë pritur për një periudhë të gjatë dhe se ato meritojnë të marrin përgjigje të plota për fatin e të dashurve të tyre.

“Familjet kanë pritur gjatë dhe u takon ta dinë të vërtetën e plotë, si dhe të shohin drejtësinë të vihet në vend. Sikurse kanë shpjeguar edhe vetë familjarët, drejtësia nuk e largon dhimbjen, por u sjell ngushëllim dhe tregon se vuajtjet e tyre nuk janë harruar”, ka thënë Gara.

Në aksionin e sotëm të Prokurorisë Speciale, të zhvilluar në bashkëpunim me Policinë, janë arrestuar nëntë persona nën dyshimin për kryerjen e krimeve të luftës. Operacioni lidhet edhe me të ashtuquajturin “Grupi i Intelektualëve”.