Fidair Berisha: Shprehja “Kosova po blindohet” nxit frikë dhe pasiguri

Eksperti i sigurisë, Fidair Berisha, ka reaguar lidhur me raportimet se “Kosova po blindohet” përpara shpalljes së vendimit ndaj ish-presidentit Hashim Thaçi dhe të tjerëve në Hagë. Sipas tij, ky përshkrim nuk pasqyron realitetin dhe përdorimi i një terminologjie të tillë në një moment delikat kërkon kujdes të shtuar nga mediat.

Berisha shpjegon se institucionet e sigurisë marrin masa shtesë vetëm pasi analizojnë të dhëna konkrete dhe kryejnë vlerësime profesionale të rrezikut. Në raste të tilla, ndërhyrjet parandaluese synojnë mbrojtjen e qytetarëve dhe të institucioneve.

“Kur institucionet kompetente të sigurisë vlerësojnë se janë të nevojshme masa shtesë, ato veprojnë mbi bazën e informacioneve konkrete dhe vlerësimeve profesionale të sigurisë. Në këtë mënyrë ndërmerren hapa preventivë për t’u garantuar qytetarëve të vendit siguri”, është shprehur ai.

Sipas ekspertit, garantimi i sigurisë së qytetarëve dhe institucioneve është detyrë e shtetit. Ai shton se, nëse ka arsye reale për shqetësim, masat parandaluese janë të domosdoshme dhe se në rastin konkret ato mund të jenë marrë për shkak të informacioneve mbi një rrezik të mundshëm për situatën e sigurisë.

Megjithatë, Berisha vëren se fraza “Kosova po blindohet”, kur përdoret pa fakte dhe argumente konkrete, mund të ndikojë në krijimin e një ndjesie të panevojshme frike dhe pasigurie te qytetarët.

“Përdorimi i shprehjeve si ‘Kosova po blindohet’, pa asnjë argument të vetëm për momentin dhe pa fakte konkrete, mund të krijojë një perceptim të panevojshëm të frikës dhe pasigurisë”, ka deklaruar Berisha.

Ai kërkon që institucionet e sigurisë të tregohen transparente, ndërsa mediat të publikojnë vetëm të dhëna të konfirmuara nga autoritetet përgjegjëse. Berisha paralajmëron se informacionet e pakontrolluara, sidomos në një periudhë kaq të ndjeshme, mund të përdoren për të shtuar tensionet, për të ndikuar te opinioni publik dhe për të krijuar përshtypjen se vendi ndodhet pranë destabilizimit.

“Mendoj se informacionet e pakonfirmuara, veçanërisht në një periudhë të tanishme kaq të ndjeshme, mund të shfrytëzohen për të rritur tensionet, për të ndikuar në perceptimin e publikut ose për të krijuar ndjenjën se vendi është në prag të ndonjë destabilizimi, gjë që fare nuk i shkon për shtati Kosovës”, ka thënë ai.

Në përfundim, eksperti u kërkon qytetarëve të ruajnë qetësinë dhe të respektojnë institucionet bashkë me vendimet e tyre. Ndërkohë, çdo masë sigurie, sipas tij, duhet të jetë proporcionale, profesionale dhe e mbështetur në vlerësime reale të rrezikut.

“Mesazhi im do të ishte i qartë: të ruhet qetësia, të respektohen institucionet dhe vendimet e saj, ndërsa çdo masë sigurie të jetë proporcionale, profesionale dhe e bazuar në vlerësime reale të rrezikut. Kosova ka nevojë për përgjegjshmëri institucionale dhe informim të saktë, jo për panik apo spekulime”, ka përfunduar Berisha.