Fetoshi kërkon maturi dhe unitet: Apeli, beteja kryesore e Kosovës

Pas verdiktit dënues të Gjykatës Speciale në Hagë ndaj ish-drejtuesve të Ushtrisë Çlirimtare të Kosovës, drejtori i Institutit “Octopus”, Arben Fetoshi, ka kërkuar qetësi, bashkim politik dhe fokusim te procedura e apelit.

Sipas tij, vendimi ka nxitur një “revoltë të kuptueshme”, por Kosova duhet të përgjigjet me kujdes dhe përmes një qasjeje strategjike.

Fetoshi ka vlerësuar se Gjykata Speciale përbën një padrejtësi që iu imponua Kosovës me këmbënguljen e partnerëve strategjikë, pas situatës së rënduar të krijuar nga, siç i ka quajtur ai, fabrikimet monstruoze kundër UÇK-së dhe udhëheqësve të saj.

Megjithatë, ai ka kundërshtuar kërkesat për shfuqizimin e Gjykatës Speciale. Fetoshi ka sqaruar se, edhe pse një nismë e tillë mund të ndërmerret procedurialisht në Kuvend, ajo nuk do ta zgjidhte çështjen dhe mund t’i sillte Kosovës pasoja serioze në arenën ndërkombëtare.

Duke folur për bazën juridike të kësaj gjykate, ai ka theksuar se funksionimi i saj nuk mbështetet vetëm në ligjin për themelimin, por gjithashtu në marrëveshjen ndërkombëtare me BE-në dhe në nenin 162 të Kushtetutës së Kosovës.

Vendimin e ka cilësuar skandaloz, por ka paralajmëruar se mllefi nuk duhet të shndërrohet në strategji shtetërore.

Në Kosovë, pas shpalljes së verdiktit dënues në Hagë, janë bërë reagime dhe thirrje për ruajtjen e qetësisë.

Fetoshi ka paralajmëruar se çdo incident ose përshkallëzim mund ta dëmtojë pozicionin e Kosovës dhe të përdoret në funksion të propagandës së Serbisë.

Sipas tij, kthimi i zemërimit në veprime që mund të instrumentalizohen do të përbënte një rrezik fatal për sakrificën sublime të UÇK-së dhe të udhëheqësve të saj.

Ai ka nënvizuar se sulmet nuk mund ta ndryshojnë vendimin e Gjykatës Speciale, ndërsa mund ta dobësojnë pozitën ndërkombëtare të Kosovës.

Për këtë arsye, Fetoshi ka kërkuar që energjia dhe vëmendja të orientohen drejt procesit të apelit. Sipas tij, thirrjet e nxitura nga revolta për zhbërjen e gjykatës nuk duhet ta lënë në hije betejën më të rëndësishme që vijon, atë të apelit.

Ai ka propozuar që udhëheqësit institucionalë dhe politikë të Kosovës të paraqiten së bashku në një konferencë për media, prej nga do t’u kërkonin qytetarëve qetësi, maturi dhe përmbajtje.

Një qëndrim i përbashkët, sipas Fetoshit, do t’u tregonte edhe partnerëve ndërkombëtarë se Kosova e kundërshton vendimin, por mbetet e bashkuar kur bëhet fjalë për mbrojtjen e interesave të saj.

Ai ka theksuar se dhimbja e sotme është legjitime, por vendi duhet të qëndrojë i bashkuar për të mos e dëmtuar shtetin. Fetoshi ka shtuar se asnjë reagim në afekt dhe asnjë incident publik nuk i shërben interesit të Kosovës.

Në fund, ai e ka përmbledhur qëndrimin e tij në tri shtylla: betejë juridike në procesin e apelit, betejë politike për ruajtjen e unitetit dhe betejë strategjike në mbrojtje të interesave të Republikës së Kosovës.