Fermerët protestojnë para Ministrisë së Bujqësisë, derdhin qumështin në tokë dhe kërkojnë trajtim me dinjitet nga shteti

Para Ministrisë së Bujqësisë, fermerët e qumështit kanë dalë sot në protestë, duke shprehur pakënaqësinë e tyre dhe duke kërkuar ndërhyrje të menjëhershme për një gjendje që, sipas tyre, po i afron fermat me falimentimin.

Si shenjë revolte, ata po e derdhin qumështin në tokë gjatë protestës, pasi prej katër ditësh grumbullimi i tij është ndërprerë përkohësisht, në prag të mbylljes së përkohshme të qumështores Vita.

Protestuesit kanë paraqitur tri kërkesa konkrete: rifillimin e menjëhershëm të grumbullimit të qumështit, publikimin sa më shpejt të rezultateve për të larguar dyshimet ndaj produkteve vendore, si dhe rikthimin e çmimit të mëparshëm të qumështit për të shmangur falimentimin e fermave.

Gjatë tubimit, fermerët kanë kërkuar që shteti t’i trajtojë “me dinjitet dhe respekt”. Po ashtu, aty u tha edhe se “qumështi i Vitës është i Kosovës, jo i Serbisë”.