Dogana zbulon mbi 54 mijë euro të padeklaruara në pikën kufitare të Kullës

Gjatë kontrollit të një automjeti në pikën kufitare të Kullës, Dogana e Kosovës ka zbuluar mjete monetare të padeklaruara me vlerë mbi 54 mijë euro.

Automjeti ishte ndaluar për verifikim në vijën e dytë të kontrollit. Gjatë inspektimit, zyrtarët doganorë gjetën para të gatshme në euro, si edhe në valuta të huaja.

Pas përllogaritjes së shumës sipas kursit zyrtar të këmbimit, vlera e përgjithshme e parave të padeklaruara rezultoi mbi 54 mijë euro.

Sipas njoftimit të Doganës së Kosovës, në zbatim të procedurave ligjore dhe udhëzimeve të organit kompetent, është konfiskuar 25% e shumës së padeklaruar, që përbën një vlerë mbi 13,500 euro. Pjesa tjetër e mjeteve është proceduar në përputhje me procedurat përkatëse.

Dogana e Kosovës u ka rikujtuar udhëtarëve se gjatë kalimit të kufirit duhet të deklarojnë mjetet monetare, në respektim të legjislacionit në fuqi.