Dogana e Kosovës kërkon paraqitjen e menjëhershme të mallrave pas mbërritjes

Operatorët ekonomikë dhe personat përgjegjës për transportin duhet të sigurohen që mallrat e sjella në territorin doganor të Republikës së Kosovës t’i paraqiten Doganës menjëherë pas arritjes.

Procedura mund të kryhet në zyrën doganore të përcaktuar, në një hapësirë tjetër të caktuar ose të miratuar nga Dogana, si dhe në zonë të lirë.

Për paraqitjen e mallrave përgjegjës mund të jetë personi që i ka sjellë ato në territorin doganor të Republikës së Kosovës, personi në emër dhe për llogari të të cilit vepron sjellësi i mallrave, ose personi që merr përsipër transportimin e tyre pasi mallrat të kenë hyrë në këtë territor.

Dogana e Kosovës nënvizon se respektimi i afatit dhe kryerja e rregullt e kësaj procedure përbëjnë detyrim doganor, ndërsa ndihmojnë në garantimin e një zhdoganimi të sigurt dhe transparent.