Dëshmia e Gani Mehmetajt: Momenti kur Baton Haxhiu kërkoi eliminimin tim dhe të vëllait

Publicisti dhe veprimtari Gani Mehmetaj ka zbuluar në një shkrim të tij në Facebook një episod tronditës nga e kaluara, ku Baton Haxhiu kishte bërë thirrje për vrasjen e tij dhe të vëllait, Ali Mehmetaj.

Sipas tij, kjo thirrje erdhi në një periudhë tejet të errët, kur humbën jetën disa gazetarë dhe mbi 200 aktivistë të Lidhjes Demokratike të Kosovës.

Mehmetaj thekson se nuk do ta kujtonte fare figurën e Haxhiut, nëse ky i fundit nuk do të shfaqej sot me një qëndrim edhe më sfidues në ekranet shqiptare.

Në postimin e plotë, ai rrëfen: “Para 25 vjetësh, Baton Haxhiu kërkoi publikisht të më hiqni qafe mua dhe vëllain tim Aliun (tashmë i ndjerë). Ishin ditët kur errësira e natës ishte njësoj si mëngjesi i pasigurt. Atë kohë u ekzekutuan disa kolegë gazetarë dhe mbi 200 anëtarë të LDK-së. Unë i shpëtova njerëzve të armatosur të Baton Haxhiut.”

Ai shton se ndërhyrja e tij publike sot ka një arsye specifike: “Nuk do të merresha me një individ të njollosur, i cili dikur bashkëpunonte me regjimin serb, nëse ai nuk do të kthehej në një figurë të lavdëruar në Prishtinë nga disa fraksione politike dhe në Tiranë nga Edi Rama dhe shërbimet e Vuçiqit.”

Mehmetaj shprehet se heshtja e tij do të kishte vazhduar, por toni i Haxhiut në televizionet shqiptare është bërë edhe më arrogant dhe i pacipë. “Në ato studio, ai blen hapësira, rekruton mercenarë me financime të dyshimta dhe imponon narrativën, ndonëse ka njohuri elementare,” përfundon ai.