Dehari kërkon marrëveshje politike: Vetëm konstituimi i Kuvendit nuk e zgjidh krizën

Avni Dehari, kryesues i seancës konstitutive të Kuvendit të Kosovës, u ka kërkuar partive politike të dialogojnë dhe të arrijnë një marrëveshje, pasi, sipas tij, vazhdimi i seancës pa dakordim paraprak do ta përshkallëzonte edhe më shumë tensionin institucional.

Dehari deklaroi se ngjarjet e para tri ditëve në Kuvendin e Republikës së Kosovës konfirmuan paralajmërimet e tij të mëhershme. Ai vlerësoi se përpjekjet për ta vijuar seancën pa një marrëveshje politike shtojnë mundësinë e përplasjeve, përfshirë edhe rrezikun e një konflikti fizik brenda sallës së Kuvendit.

Pas qëndrimit të ri të LDK-së, ai përshëndeti ftesat e kryetarit të Lëvizjes VETËVENDOSJE!, Albin Kurti, si dhe ato të ushtrueses së detyrës së presidentes, Albulena Haxhiu, që partitë politike të marrin pjesë në një takim konsultativ.

Sipas tij, tejkalimi i bllokadës institucionale kërkon përgjegjësi politike, bisedime dhe një marrëveshje që siguron funksionim të qëndrueshëm të institucioneve të Kosovës.

Në reagimin e plotë drejtuar qytetarëve, Dehari u bëri thirrje të gjitha subjekteve politike që të ulen në një tryezë të përbashkët, të përmbushin përgjegjësitë e tyre dhe të gjejnë një zgjidhje politike. Një dakordim i tillë, sipas tij, duhet t’i hapë rrugë konstituimit të Kuvendit, krijimit të Qeverisë dhe marrëveshjes për një President konsensual.

Ai paralajmëroi se konstituimi i Kuvendit dhe formimi i Qeverisë, në mungesë të një marrëveshjeje paraprake për Presidentin, do të çonte në zgjedhje të parakohshme, skenar që, sipas tij, duhet shmangur.

Dehari rikujtoi se qytetarët e Kosovës janë ftuar tri herë gjatë dy vjetëve të fundit për të shprehur vullnetin e tyre përmes votës. Ai theksoi se populli tashmë ka folur dhe se tani u takon përfaqësuesve politikë të arrijnë marrëveshjen e nevojshme, në mënyrë që vendi të ketë institucione funksionale dhe të qëndrueshme.