Daut Haradinaj poston fotografi nga sheshi: Ose feston dënimin si Serbia, ose e kundërshton si shqiptar

Pas vendimeve dënuese të Gjykatës Speciale në Hagë për ish-drejtuesit e UÇK-së, Daut Haradinaj nga Aleanca ka reaguar publikisht.

Në një postim në Facebook, të shoqëruar me fotografi nga sheshi, Haradinaj ka kundërshtuar atë që e përshkruan si propagandë për demoralizimin e qytetarëve që shfaqin revoltë ndaj vendimeve të Hagës.

Ai ka akuzuar për hipokrizi disa persona që më herët kanë marrë pjesë në protesta për çështje të ndryshme në Shqipëri, por që sot, sipas tij, shprehin kënaqësi për mbajtjen e Çlirimtarëve në kafaz në Hagë.

Sipas Haradinajt, përmes një qëndrimi të tillë synohet të relativizohet lufta e UÇK-së dhe të ndërtohet një narrativë që e ka dëmtuar Kosovën ndër vite.

“Sot nuk ka rrugë të mesme: ose i gëzohesh dënimit si Serbia, ose e kundërshton atë me dinjitet si qytetar e shqiptar”, ka shkruar Haradinaj.

Në përmbyllje të reagimit, ai ka nënvizuar rëndësinë e lirisë së shprehjes, ndërsa u është drejtuar personave që, sipas tij, i shërbejnë kësaj agjende dashakeqe.

“Po lirisë së shprehjes, por JO e madhe për ju që jeni në shërbim të kësaj agjende dashakeqe. Marre për ju!”, ka përfunduar Haradinaj.