Çun Lajçi ngre dilema për mbështetjen selektive ndaj ish-pjesëtarëve të UÇK-së në Hagë

Aktori Çun Lajçi ka shprehur shqetësim për atë që e konsideron trajtim të pabarabartë në përkrahjen publike ndaj ish-pjesëtarëve të Ushtrisë Çlirimtare të Kosovës, të cilët janë gjykuar ose po përballen me gjykime në Hagë.

Përmes një postimi në Facebook, ai ka vënë në dukje se për disa të akuzuar organizohen protesta dhe shfaqet solidaritet i gjerë, ndërsa disa emra të tjerë, sipas tij, pothuajse janë harruar.

Lajçi ka përmendur veçanërisht Salih Mustafën, i njohur si komandant Cali, si edhe Pjetër Shalën, duke kërkuar të dijë pse edhe për ta nuk është organizuar një angazhim i ngjashëm publik.

“Pse për Calin e Pjetër Shalën s’u organizuan kurrë protesta para gjyqit në Hagë? Ç’është ky selektim? Kjo ndamje?”, ka shkruar Lajçi.

Ai ka ngritur pyetjen nëse Rexhep Selimi, Kadri Veseli, Jakup Krasniqi dhe të tjerët vlerësohen më pak se Hashim Thaçi, duke theksuar se kontributi i secilit duhet të njihet pa dallime.

“A s’asht Rexha po aq i rëndësishëm sa Hashimi? A s’asht Kadria po aq trim sa Cali? Po Jakupi, pse anashkalohet? A s’ishte faktor në Shtabin e UÇK-së?”, ka pyetur ai.

Aktori është shprehur i vetëdijshëm se qëndrimi i tij mund të sjellë reagime kundërshtuese dhe sulme, por ka nënvizuar se nuk mund të qëndrojë në heshtje për personat që, sipas tij, po lihen në harresë.

“Si të hesht për çlirimtarët që harrohen? Si të hesht për çlirimtarët, kur Kosova po shkërmoqet për së gjalli e ne po zgjedhim kë me kujtue e kë me harrue?”, ka shkruar ai.

Në fund të reagimit, Lajçi ka theksuar se heroizmi dhe kontributi nuk duhen gjykuar nga sa shpesh përmenden emrat në tribuna, por nga vullneti që të mos harrohet asnjë prej atyre që dhanë kontribut në luftë.

“Heronjtë nuk maten me atë se sa herë përmenden nëpër tribuna, por me atë se sa herë ne kemi guximin të mos i harrojmë”, ka përfunduar Lajçi.

Qëndrimet e paraqitura në këtë reagim përbëjnë vlerësime personale të aktorit.