Burim Ramadani kallëzon penalisht Albulena Haxhiun lidhur me nominimin e Auditorit të Përgjithshëm

Burim Ramadani, nënkryetar i Aleancës, ka paraqitur kallëzim penal ndaj ushtrueses së detyrës së presidentes, Albulena Haxhiu, duke e akuzuar për keqpërdorim të detyrës zyrtare.

Ramadani pretendon se Haxhiu ka vepruar në kundërshtim me ligjin kur ka propozuar Vlorë Spancën për një mandat të ri në postin e Auditore së Përgjithshme.

Sipas deputetit të Aleancës, më 2 shtator 2026 ushtruesja e detyrës së presidentes e ka marrë këtë vendim pa zhvilluar konkurs publik dhe pa intervistimin e kandidates nga një komision i pavarur, procedura që, siç ka theksuar ai, kërkohen nga ligji.

Ai ka vlerësuar se në këtë rast janë cenuar dispozitat e nenit 4 të Ligjit për Auditorin e Përgjithshëm dhe Zyrën Kombëtare të Auditimit, konkretisht paragrafët 4.4, 4.5.2 dhe 4.9.

Ramadani ka thënë gjithashtu se Haxhiu e ka përdorur funksionin e saj zyrtar për t’i krijuar një personi mundësinë e përfitimit në kundërshtim me ligjin.

Pas dorëzimit të kallëzimit penal, ai është shprehur: “Ligji është mbi të gjithë! Askush nuk duhet të keqpërdorë pozitën zyrtare!”