Besnik Tahiri: Bllokimi i Kuvendit e ka zhytur Kosovën në krizë të thellë

Deputeti i Aleancës, Besnik Tahiri, ka akuzuar shumicën parlamentare se, përmes moskonstituimit të Kuvendit dhe mospërmbushjes së detyrës së saj kushtetuese, e ka futur Kosovën në një depresion të thellë shoqëror, ekonomik dhe politik.

Sipas Tahirit, situata në vend po përkeqësohet dhe po afrohet me një pikë kritike, e cila prek jo vetëm funksionimin politik, por edhe sigurinë në shoqëri dhe ekonominë, përfshirë krijimin e vendeve të punës dhe mbajtjen gjallë të shtetit. Ai e cilësoi këtë si një krizë politike të paprecedentë në historinë e demokracisë së Kosovës.

Tahiri tha se kjo qasje nuk është e rastësishme, por e qëllimshme dhe synon ta çojë Kosovën drejt një krize identitare. Ai deklaroi se ky konstelacion politik ka qenë në anën e kundërt të historisë gjatë Marrëveshjes së Rambujesë, hyrjes së NATO-s në Kosovë dhe shpalljes së pavarësisë së Kosovës.

Deputeti i Aleancës shtoi se, sipas tij, po tentohet të ndërtohet një tregim i rremë dhe në kundërshtim me përpjekjet historike të kombit shqiptar në Kosovë për krijimin e një identiteti tjetër. Ai theksoi se një përpjekje e tillë nuk do të lejohet.

“Ne nuk kemi vend tjetër, as shtet tjetër dhe as arritje më të madhe kombëtare se pavarësinë e Kosovës. Kjo pavarësi është arritja më e madhe e kombit shqiptar. Për këtë tanimë ka sakrifikuar gjeneratë pas gjenerate, e kemi obligim me qenë këtu në vendin e punës tonë dhe me mbrojtur arritjen tonë më të madhe kombëtare”, tha Tahiri.