Bekteshi reagon ashpër ndaj Ramës: Tërbimi në Nju Jork dhe përdorimi i Kosovës si mburojë politike

Ramazan Bekteshi ka shpërthyer me kritika të forta ndaj kryeministrit të Shqipërisë, Edi Rama, duke e akuzuar se po e përdor çështjen e Kosovës dhe emrin e ish-presidentit Hashim Thaçi për interesa politike, ndërsa sulmon edhe qëndrimet e tij ndaj ish-presidentit amerikan Joe Biden gjatë vizitës në Nju Jork.

Në një postim të gjatë në Facebook, Bekteshi e cilëson Ramën si autokrat që nuk mjaftohet me nënshtrimin e Shqipërisë dhe injorimin e Kosovës, por që tani merret me politikë globale për të dëmtuar prestigjin ndërkombëtar. Sipas tij, Rama nuk ligjëron, por “leh me tërbim e grindje” në OKB, takime dhe studio televizive, duke pasur si objektiv Joe Biden, mikun e madh të Kosovës dhe shqiptarëve, i cili sot gjendet i sëmurë rëndë.

Bekteshi kujton se Biden, në kulmin e luftës në Kosovë, bashkë-sponsorizoi me senatorin John McCain Rezolutën S.J. Res. 20, e cila kërkonte përdorimin e të gjitha mjeteve të nevojshme për objektivat e NATO-s në Kosovë, përfshirë mundësinë e trupave tokësore. Më 20 prill 1999, Biden deklaroi se Kosova nuk ishte vetëm çështje evropiane, por edhe çështje amerikane, dhe përdori termin “Kosovar Albanians” në vend të thjesht “Kosovars” apo “Kosovans”.

Më tej, Bekteshi e akuzon Ramën se bëri një shpifje të pabesueshme në darkën e KMSHA-s në Nju Jork, duke pretenduar se Biden e “tradhtoi” Thaçin, sikur ish-presidenti të ishte përgjegjës për dënimin e tij që ende nuk është përfundimtar. Ai thekson se Biden jo vetëm që nuk e tradhtoi, por i dha Thaçit epitetin “George Washington of Kosovo”, ndonëse Bekteshi mendon se ky epitet i shkon më shumë Ibrahim Rugovës.

Bekteshi përmend gjithashtu se Rama harroi energjinë që miku i tij Soros dha për ta afruar me demokratët dhe Shtëpinë e Bardhë, ndërsa tani përdhos emrin e Bidenit në kohë të vështira dhe duket se kërkon pikë te Trump. Ai e lidh këtë me marrëdhënien me dhëndrin e Trumpit, Jared Kushner, dhe projektet turistike të Affinity Partners në Sazan dhe Zvërnec, që mbrohen nga qeveria e tij pavarësisht protestave mjedisore.

Ai rikujton se i njëjti Rama e quante Donald Trump “turpin e qytetërimit” në CNN në vitin 2016 dhe e paraqiste si kërcënim për Amerikën dhe marrëdhëniet shqiptaro-amerikane. Sipas tij, loja e Ramës me standarde të dyfishta ka kaluar kufijtë e politikës “inteligjente” dhe ai po shkon drejt kurthës që dikur e krijoi për të tjerët.

Në lidhje me çështjen e ish-drejtoreshës së SHISH-it, Vlora Hyseni, Bekteshi kërkon që SPAK-u të hetojë se si SHISH-i e fshehu raportin që erdhi nga Kosova për të, si u sajua një raport i falsifikuar ndërsa origjinali ndodhet në arkiv, dhe si iu dha asaj certifikata e sigurisë edhe pse kryeministri dhe presidenti ishin të njoftuar për falsifikimin. Ai shton se ata e nominuan dhe e dekretuan, edhe pse ajo ishte larguar nga AKI-ja nga presidentja e Kosovës për shkelje, dhe pyet se si Rama e mori më pas në gjirin e tij duke falsifikuar raportin zyrtar të AKI-s.

Bekteshi kërkon gjithashtu përgjigje për vjedhjen e të dhënave në vitin 2022, hakerimin e të dhënave të SPAK-ut dhe heshtjen për skemën me agjentin e FBI-së Charles McGonigal, të cilin Rama e përdori kundër rivalëve politikë. Ai thekson se këto nuk janë pyetje retorike, por çështje që kërkojnë hetim dhe përgjegjësi institucionale.

Më tej, Bekteshi akuzon Ramën se sa herë që e ka pisk në Shqipëri, konsumon emrin e Thaçit dhe të Kosovës si mburojë personale, por tani “VH alias ‘Mata Hari’ nga Kosova ia vuri zjarrin kështjellës së të gjitha projekteve të Ramës”. Ai shton se Rama e shndërron kritikën e brendshme në “komplot” dhe kundërshtarin në “instrument të të huajve”, ndërsa jashtë vendit e paraqet veten si garant të stabilitetit.

Lidhur me fjalimin e fundit në OKB, Bekteshi thekson se Rama u shiti kombeve moral, duke e përdorur “shkretëtirën” si metaforë për OKB-në, ku predikohen mesazhe që nuk dëgjohen dhe fjalët nuk prodhojnë veprim. Ai pranon se kritika ndaj mosfunksionimit të institucioneve ndërkombëtare është reale, por paradoksi qëndron te autoriteti i folësit: Rama flet për manipulimin masiv, algoritmet dhe propagandën ndërsa salla ishte e zbrazët. Bekteshi përfundon se Rama mundohet t’u japë mësim kombeve, ndërkohë që vendin e vet e ka shndërruar në një shkretëtirë pa shpresë, që braktiset vazhdimisht nga të rinjtë, dhe se në një shtet normal ai do të duhej të përfundonte në qeli me shumë bashkëpunëtorë.