BE-ja i kërkon Vuçiqit të shmangë deklaratat që pengojnë dialogun për Kosovën

Bashkimi Evropian u bëri thirrje palëve të përmbahen nga deklaratat që nuk i shërbejnë normalizimit të marrëdhënieve mes Kosovës dhe Serbisë, duke nënvizuar se vetëm dialogu mund të sjellë përparim në rrugën evropiane.

Duke komentuar deklaratat e fundit të presidentit serb Aleksandar Vuçiq për Kosovën, zëdhënësi i Komisionit Evropian tha se avancimi drejt normalizimit të raporteve ndërmjet dy vendeve mund të arrihet vetëm përmes bisedimeve. Sipas tij, duhen evituar veprimet dhe deklaratat që nuk kontribuojnë në këtë synim.

Zëdhënësi i BE-së theksoi gjithashtu se përparimi në dialogun mes Beogradit dhe Prishtinës përbën kusht paraprak që të dyja palët të avancojnë drejt Bashkimit Evropian.

Reagimi erdhi pasi Vuçiq, më 25 korrik, foli gjatë ceremonisë së promovimit të oficerëve më të rinj të Ushtrisë së Serbisë, të zhvilluar në Beograd. Ai renditi si prioritete kryesore shtetërore fuqizimin e ushtrisë, mbajtjen e neutralitetit ushtarak dhe mbrojtjen e integritetit territorial të Serbisë.

Në fjalën drejtuar oficerëve të rinj, presidenti serb deklaroi se betimi i tyre i detyron të zbatojnë Kushtetutën e Serbisë dhe të mbrojnë tërësinë territoriale të shtetit. Vuçiq shtoi se si oficerët, ashtu edhe udhëheqja shtetërore, do të përballen me lloje të ndryshme presioni, por ruajtja e integritetit territorial mbetet e një rëndësie parësore.

Vuçiq ritheksoi qëndrimin zyrtar të Beogradit se Kosova është pjesë e Serbisë, duke e mbështetur këtë pretendim te Kushtetuta serbe dhe, sipas fjalëve të tij, te “drejtësia e Zotit”.

Serbia vazhdon të mos e njohë pavarësinë e shpallur nga Kosova në vitin 2008.

Kosova dhe Serbia janë të përfshira që prej vitit 2011 në dialogun për normalizimin e marrëdhënieve, proces i cili zhvillohet me ndërmjetësimin e Bashkimit Evropian.

Gjatë këtyre bisedimeve janë arritur disa marrëveshje, megjithëse vetëm një pjesë e vogël e tyre është zbatuar konkretisht.

Përparimi në normalizimin e raporteve mbetet kusht për avancimin e të dyja vendeve, Kosovës dhe Serbisë, në procesin e integrimit evropian.