Bajrami e diskuton me Sorensenin deklaratën e ministres serbe: Shprehu publikisht atë që mendon Vuçiq

Ambasadori i Kosovës në Bruksel, njëherësh udhëheqës i ekipit negociator, Agron Bajrami, ka bërë të ditur se me emisarin e Bashkimit Evropian, Peter Sorensen, ka trajtuar deklaratën e ministres serbe lidhur me spastrimin etnik.

Sipas Bajramit, ministrja serbe e tha hapur atë që, siç vlerëson ai, mendon presidenti i Serbisë, Aleksandar Vuçiq.

“Me emisarin Sorensen kam ngritur zyrtarisht deklaratën shqetësuese të një ministre serbe, e cila mbështet publikisht spastrimin etnik të shqiptarëve në Kosovë. Ministrja serbe artikuloi atë që mendon Presidenti serb – ajo vetëm nuk duhej ta thoshte publikisht, ndërsa ai tash po përpiqet të kufizojë dëmin”, shkroi Bajrami.

Ai tha se deklarata dhe veprime të tilla të zyrtarëve serbë përbëjnë shkelje të qartë të Marrëveshjes së Brukselit të vitit 2023. Bajrami përmendi se preambula e kësaj marrëveshjeje i obligon palët të “kapërcejnë trashëgiminë e së kaluarës” dhe pranon se “paprekshmëria e kufijve dhe respekti për integritetin dhe sovranitetin territorial… janë një kusht themelor për paqen”. Sipas tij, kjo gjuhë e dëmton rëndë dialogun, besimin dhe normalizimin e mbështetur nga BE-ja, të bazuar në njohje dhe respekt të ndërsjellë.

“Distancimi i Serbisë është vetëm premtim bosh – nuk paraqet pendim të vërtetë dhe as refuzim të krimeve të periudhës së Millosheviqit. Kosova vazhdon t’i qëndrojë e përkushtuar procesit, por vetëm kur parimet e tij themelore respektohen vazhdimisht. Çfarë kuptimi ka të flitet për zbatim, kur Serbia vijon t’i cenojë Marrëveshjet me fjalë dhe me veprime?”, shtoi ambasadori Agron Bajrami.