Bahri Cani: Zgjedhjet në Serbi i dhanë fund pushtetit të Vuçiqit, Daçiqi jashtë parlamentit

Pranimi i humbjes nga Aleksandar Vuçiqi dhe rezultatet e zgjedhjeve të jashtëzakonshme në Serbi kanë rikthyer vëmendjen te e ardhmja politike e vendit, si dhe te mundësia e përfundimit të dominimit të gjatë të partive në pushtet.

Gazetari i Deutsche Welle, Bahri Cani, e ka cilësuar rezultatin si një katastrofë zgjedhore për Vuçiqin dhe Ivica Daçiqin. Ai ka vlerësuar se triumfi i Listës së Studentëve mund të sjellë një kthesë të rëndësishme politike në Serbi, duke shpresuar se ky ndryshim do të jetë për të mirë, transmeton “Bota sot”.

Sipas rezultateve të deritanishme, Lista e Studentëve ka marrë mbi 52 për qind të votave, duke siguruar shumicën absolute. Ndërkohë, lista e Vuçiqit ka grumbulluar më pak se 40 për qind. Këto konsiderohen të vetmet parti serbe që pritet të përfaqësohen në parlamentin e ri.

Parlamentit të ardhshëm pritet t’i bashkohen edhe hungarezët me tre deputetë, shqiptarët me dy deputetë, sipas të gjitha gjasave, si dhe boshnjakët me një deputet. Megjithatë, rezultatet përfundimtare ende nuk janë zyrtarizuar.

Në Serbi po mbizotëron një atmosferë jashtëzakonisht festive, pasi Vuçiqi ka humbur zgjedhjet e jashtëzakonshme. Për Canin, kjo shënon jo vetëm fundin politik të Vuçiqit, por edhe të Daçiqit, ndërsa Partia Socialiste nuk pritet ta kalojë pragun zgjedhor.

Serbia tashmë ndodhet përballë një ndryshimi të madh politik, për të cilin mbetet shpresa se do të jetë në drejtimin e duhur.