Avokatja e Arlinda Zekajt: Ajo më thoshte se do ta vriste, pasi ai rrinte gjithë kohën me Haradinajt

Adelina Hoxha, avokatja që përfaqësonte Arlinda Zekajn, 49-vjeçaren e vrarë në Vitomiricë të Pejës, ka rrëfyer se klientja e saj kishte shprehur në mënyrë të përsëritur frikën se do të vritej. Sipas saj, Zekaj i kishte thënë se ish-bashkëshorti i saj e kalonte pjesën më të madhe të kohës me persona që mbanin mbiemrin Haradinaj.

“Arlinda ma ka potencu: ‘Ka me m’vra, se ai tanë kohën është me Haradinajt’”, ka thënë Hoxha.

Avokatja ka sqaruar se përmendja e këtij mbiemri nuk bëhet me qëllim që të akuzojë apo t’i ngarkojë dikujt përgjegjësi. Ajo ka deklaruar se e konsideron detyrim profesional dhe moral të përcjellë atë që viktima i kishte treguar para vrasjes.

Fakti që është përmendur mbiemri Haradinaj nuk përbën provë se ndonjë person me këtë mbiemër ka qenë i përfshirë në rast. Deri tani, institucionet e drejtësisë nuk kanë publikuar të dhëna që i lidhin persona me mbiemrin Haradinaj me vrasjen.

Drejtori i Policisë jep dorëheqjen

Pas rastit, Drejtori i Përgjithshëm i Policisë së Kosovës, Gazmend Hoxha, dha dorëheqje. Të premten, kryeministri Albin Kurti bëri të ditur se e kishte pranuar kërkesën e Hoxhës dhe e kishte liruar atë nga detyra. Me propozimin e ministrit Xhelal Sveçla, në këtë post është caktuar një ushtrues detyre. Në një prononcim për Radio Evropa e Lirë, Hoxha e përshkroi largimin e tij si “dorëheqje morale”.

Pezullime në polici e prokurori

Policia e Kosovës pezulloi një ditë më herët 11 zyrtarë policorë të Pejës, për shkak të mënyrës se si ishte trajtuar rasti. Ndërkohë, Këshilli Prokurorial i Kosovës publikoi vendimin për zëvendëskryeprokuroren e Pejës. Sipas KPK-së, ajo kishte qenë në dijeni se më 22 tetor ishte shkelur urdhri për mbrojtjen e Arlinda Zekajt, por nuk kishte ndërmarrë masat e nevojshme prokuroriale.

Opozita e ka cilësuar të pamjaftueshme këtë masë. PDK-ja deklaroi se dorëheqja e drejtorit të Policisë nuk e përjashton ministrin Sveçla nga përgjegjësia për dështimet në këtë institucion. Ndërsa ministrja e Drejtësisë, Donika Gërvalla, më herët ka refuzuar të japë dorëheqjen.

Vrasja pas paralajmërimeve të vazhdueshme

Mbrëmjen e 25 tetorit, Arlinda Zekaj u vra me sëpatë pranë banesës së saj në Vitomiricë. Ngjarja ndodhi vetëm pak minuta pasi policia e kishte shoqëruar atë në shtëpinë e përbashkët, në zbatim të një vendimi gjyqësor. Po atë ditë, ajo kishte raportuar ish-bashkëshortin për dhunë në familje, ndërsa ai ishte ndaluar për 48 orë. Kunati i saj, i dyshuar për vrasjen, u arrestua në Deçan në orët e vona të 27 tetorit.

Zekaj kishte kërkuar mbështetje nga institucionet për disa muaj. Dy ditë para se të vritej, ajo i ishte drejtuar me shkrim kryeprokurores së Pejës, duke u ankuar për mënyrën e trajtimit të rastit dhe për moszbatimin e vendimit të gjykatës. Kryeministri Kurti e ka cilësuar ngjarjen si pasojë të një zinxhiri lëshimesh sistemore nga institucionet. Vrasja ka shkaktuar protesta në Prishtinë, Pejë dhe qytete të tjera.