Avokati serb kërkon hetime në tri vende për dyshimet mbi blerjen e votave në favor të Vuçiqit

Avokati serb Çedomir Stojkoviq u bëri sot thirrje autoriteteve të Kosovës, Malit të Zi dhe Bosnjë-Hercegovinës të hetojnë në territoret e tyre pretendimet për blerje votash në favor të listës së presidentit serb, Aleksandar Vuçiq.

Kërkesa pason raportimet se votuesve serbë u janë ofruar nga 100 euro për të udhëtuar drejt Serbisë dhe për të votuar për Partinë Progresive Serbe (SNS).

Stojkoviq kërkon që institucionet e tri vendeve të përcaktojnë kush i financon udhëtimet dhe autobusët, nga burojnë paratë dhe cilët persona merren me shpërndarjen e tyre dhe organizimin e transportit. Ai ka pyetur gjithashtu sa po u paguan Vuçiq serbëve nga këto vende për të shkuar në Serbi e për të votuar për SNS-në.

Sipas avokatit, duhet sqaruar nëse mjetet financiare vijnë nga fonde publike të keqpërdorura apo nga burime të tjera të paligjshme.

Në deklarimin e tij, Stojkoviq përmendi edhe pretendime për lidhje mes karteleve të drogës dhe strukturave politike të Vuçiqit, duke iu referuar komunikimeve të publikuara në platformën “Sky”. Edhe këto pretendime mbeten për t’u verifikuar nga organet kompetente.

Ai vlerëson se hetimet në Kosovë, Mal të Zi dhe Bosnjë-Hercegovinë mund të zbulojnë kush mund të jetë përfshirë në organizimin dhe financimin e udhëtimeve, si edhe në manipulimin e procesit zgjedhor. Sipas tij, nisja e tyre do të ndihmonte edhe marrëdhëniet e fqinjësisë së mirë në rajon, ndërsa ai pretendon se autoritetet serbe po pengojnë hetime të tilla brenda Serbisë.

Stojkoviq theksoi se qytetarët serbë kanë të drejtë të mësojnë si janë shpenzuar paratë që mund të jenë keqpërdorur dhe kush mund të jetë përfshirë në manipulime zgjedhore përtej kufijve të Serbisë.

Ai tha se është veçanërisht e rëndësishme të identifikohen serbët nga këto vende që mund të jenë përfshirë në detyrim zgjedhor, korrupsion dhe manipulim. Sipas tij, veprime të tilla përbëjnë sulm ndaj qytetarëve të Serbisë dhe janë vepra penale edhe në vendet ku ai kërkon hetime. Stojkoviq u shpreh se pret rezultatet e këtyre hetimeve.

Deri tani, raportimet për pagesat ndaj votuesve dhe dyshimet mbi prejardhjen e parave mbeten akuza që kërkojnë hetim dhe verifikim nga institucionet përkatëse.