Avokati i Thaçit paralajmëron apelimin: Ditë e zezë për drejtësinë ndërkombëtare, Kuvendi i Kosovës duhet të reagojë

Pierre-Richard Prosper, avokati i Hashim Thaçit, e përshkroi vendimin ndaj klientit të tij si një “tallje me drejtësinë”, ndërsa konfirmoi se mbrojtja do ta kundërshtojë atë përmes apelimit.

Sipas Prosper, përfundimi i gjykimit ishte vendosur paraprakisht. Ai akuzoi Dhomat e Specializuara se po ndryshojnë historinë, duke e portretizuar UÇK-në si një strukturë të organizuar dhe duke ia ngarkuar Thaçit përgjegjësinë.

Pas shpalljes së aktgjykimit, avokati deklaroi se kjo përbën një ditë të errët për drejtësinë ndërkombëtare dhe shënon fundin e tribunaleve.

Prosper bëri të ditur se kishte komunikuar me Thaçin dhe se do të zhvillonte një tjetër takim me të.

Ai tregoi se Thaçi e çmon jashtëzakonisht mbështetjen e qytetarëve dhe është i gatshëm të vazhdojë betejën për veten dhe Kosovën.

Avokati shtoi se mund të përballej me telashe për komentin e tij, por rrëfeu se kishte goditur kokën me grushte në momentin kur gjykatësi shqiptoi fjalët “në emër të popullit të Kosovës”. Sipas tij, gjykata nuk e dëgjoi mbrojtjen.

Prosper kërkoi që Parlamenti i Kosovës ta shqyrtojë këtë çështje, duke theksuar se Dhomat e Specializuara janë rezultat i një partneriteti ndërmjet Bashkimit Evropian dhe Parlamentit të Kosovës. Ai tha se, po të varej prej tij, mbështetja do të tërhiqej që të nesërmen.

Sipas avokatit, Kosova duhet të marrë një vendim sovran, pasi në rrethana të caktuara nevojitet të ngrihesh dhe të vendosësh.

Në përfundim, Prosper u shpreh i bindur se Thaçi do të lirohet në një moment, ndërsa theksoi se beteja dhe lufta do të vazhdojnë.