Auditimi i Hidrodrinit evidenton mospërputhje mbi 1 milion euro në pasuri, kërkohet hetim prokurorial

Dobësi në administrimin e financave, pasaktësi në regjistrat e pasurive dhe në llogaritë e arkëtueshme, si dhe kontrolle të brendshme të pamjaftueshme janë ndër problemet e evidentuara nga Zyra Kombëtare e Auditimit (ZKA) në Kompaninë Rajonale të Ujësjellësit “Hidrodrini” për vitin 2025.

Raporti me 14 rekomandime u diskutua në Komisionin parlamentar për Mbikëqyrjen e Financave Publike. Gjatë shqyrtimit, drejtuesit e ndërmarrjes u pyetën për gjetjet, ndërsa deputeti Eman Rrahmani kërkoi që çështja t’i dërgohet Prokurorisë.

Duke prezantuar raportin, kryetari i komisionit Besian Mustafa tha se auditimi ka nxjerrë në pah mangësi të konsiderueshme në saktësinë dhe mënyrën e paraqitjes së pasqyrave financiare.

Mustafa paraqet gjetjet e auditimit

“Auditimi i KRU Hidrodrini për vitin 2025 ka evidentuar probleme të theksuara në saktësinë dhe paraqitjen e pasqyrave financiare. Mes tyre janë mosregjistrimi ose mbivlerësimi i pasurive, pasaktësi në llogaritë e arkëtueshme dhe të paluajtshme, paraqitje e papërshtatshme e të hyrave nga grantet, si dhe mungesë të evidencave dhe shpalosjeve të nevojshme. Janë vërejtur gjithashtu dobësi në menaxhimin financiar e kontrollin e brendshëm, përfshirë administrimin e kontratave nëpërmjet e-prokurimit, numrin e ulët të kontratave me konsumatorët dhe mosfunksionimin e mekanizmave të auditimit të brendshëm. Raporti për vitin 2025 përmban 14 rekomandime: dy të reja, tetë të përsëritura nga viti 2024 dhe katër pjesërisht të përsëritura”, deklaroi Mustafa.

Një prej çështjeve kryesore të raportit është hendeku mes vlerës së pasurive të regjistruara në pasqyrat financiare dhe asaj që figuron në regjistrin e pasurive.

Mospërputhje prej 1 milion e 45 mijë e 549 eurosh në vlerën e pasurive

“Në pasqyrën e pozitës financiare, pasuritë afatgjata janë paraqitur në vlerën 39 milionë euro, ndërsa regjistri i pasurive tregon vlerën 38 milionë euro. Diferenca mes tyre është 1 milion e 45 mijë e 549 euro. Ndërmarrja e ka bërë vlerësimin e pasurive për herë të fundit në vitin 2005. Nga llogaritë e arkëtueshme bruto prej 17 milionë e 188 mijë e 428 eurosh, mbi 97% ishin më të vjetra se një vit, pa u njohur humbjet e pritshme. Është miratuar një draft-rregullore për provizionimin e këtyre llogarive, por ajo nuk është përfunduar për shkak të mungesës së bordit të drejtorëve. Gjatë vitit 2025 nuk janë bërë harmonizime të rregullta me furnitorët, prandaj llogaritë e pagueshme nuk pasqyrojnë saktë gjendjen”, tha Mustafa.

Kryesuesja e Bordit të Hidrodrinit, Qëndresa Kukaj, u shpreh se disa nga rekomandimet janë adresuar, ndërsa puna për të tjerat vazhdon.

Kukaj: Një pjesë e rekomandimeve janë trajtuar

“Çështja e kontratave që nuk paraqiteshin në e-prokurim është trajtuar dhe tash të gjitha kontratat menaxhohen përmes sistemit. Mund të paraqesim dëshmi për këtë. Është adresuar edhe mungesa e komisionit të auditimit, pasi bordi u emërua në prill. Për regjistrimin e pasaktë të aseteve të impiantit dhe gjetjet e tjera, trajtimi është i pjesshëm; menaxhmentit i është kërkuar menjëherë të sigurojë dokumentet dëshmuese. Tri gjetje janë trajtuar dhe gjashtë janë në proces. Për pronat e paidentifikuara, menaxhmenti është udhëzuar dhe kryeshefi ka përgatitur listën e plotë të pronave të kompanisë, por kjo çështje ende po trajtohet. Edhe identifikimi i konsumatorëve është zgjidhur pjesërisht: disa të hyra të regjistruara te konsumatorët e paidentifikuar u përkasin shkollave dhe universiteteve”, tha Kukaj.

Kryeshefi ekzekutiv Dri Cena tha se, krahasuar me vitet e mëparshme, kompania ka bërë përparim. Ai pranoi se mbeten probleme, veçanërisht sa i përket lidhjes së kontratave me konsumatorët.

Sipas Cenës, para se të zgjidhej në këtë detyrë në vitin 2023, ndërmarrja nuk ishte audituar nga ZKA-ja.

Cena thotë se auditi i parë i ZKA-së u krye më 2023

“U zgjodha kryeshef ekzekutiv në qershor të vitit 2023. Para asaj kohe, ndërmarrja nuk ishte audituar nga ZKA-ja, ndoshta për më shumë se pesë vjet. Auditi i parë i ZKA-së u zhvillua në vitin 2023. Më herët, kontrollet ishin kryer nga auditorë privatë dhe opinionet e tyre ndryshonin shumë nga ai i ZKA-së. Nga gjetjet e viteve 2023 deri në 2025 vërehen përmirësime të shumta. Sa u përket kontratave me konsumatorët, numri i tyre është shumë i vogël. Siç tha edhe kryesuesja, shumë prej tyre hezitojnë të lidhin kontratë, por ne vazhdojmë përpjekjet për t’i bindur”, deklaroi Cena.

Raporti shkaktoi reagime edhe te anëtarët e komisionit. Rrahmani e quajti atë shqetësues dhe kërkoi që komisioni t’ia përcjellë Prokurorisë për hetim.

Rrahmani kërkon hetim nga Prokuroria

“Raporti është shqetësues. Edhe komisioni duhet t’ia dërgojë Prokurorisë dhe t’i kërkojë të merret me të, sepse kompania nuk i ka paraqitur saktë pasqyrat financiare në bilancin e saj. Ka arsye për hetim. Kanë kaluar tri borde gjatë këtij pushteti, por problemet e evidentuara nuk janë zgjidhur dhe kompania nuk është vënë në rrugën e duhur. Janë mangësi shumë serioze. Sipas auditimit të Zyrës Kombëtare të Auditimit, në llogaritë e arkëtueshme është gjetur një diferencë mbi 1 milion euro që nuk përputhet, çka nënkupton se kompania mund të ketë mashtruar”, tha Rrahmani.

Komisioni është duke shqyrtuar tashmë raportin e auditimit për pasqyrat financiare vjetore të ndërmarrjes Trepça.