Ardian Gjini: Propozimi i Aleancës nuk është kusht për pushtet, por rrugë për zhvillimin strategjik të vendit

Kryetari i Aleancës, Ardian Gjini, gjatë një interviste në emisionin “Pressing”, ka dhënë sqarime rreth gjashtë pikave të ofertës së partisë së tij. Ai theksoi se ky propozim nuk fsheh interesa personale apo ambicie për poste qeveritare, por ka si qëllim të vetëm tejkalimin e ngërçit politik dhe hedhjen e hapave strategjikë për të ardhmen e Kosovës.

Gjini hodhi poshtë idenë se bëhet fjalë për kushte ndaj Lëvizjes Vetëvendosje. “Ne nuk po imponojmë asgjë, kjo është një ndihmesë për të dalë nga bllokada aktuale. Propozimi ynë synon përmirësimin konkret të jetesës së qytetarëve dhe rregullimin e mekanizmave që do t’i shërbejnë Kosovës në dekadat e ardhshme,” u shpreh ai. Në qendër të kësaj platforme qëndron pranimi i gazit amerikan, të cilin Gjini e cilësoi si një domosdoshmëri që duhet finalizuar brenda një afati të ngushtë 9-10 mujor.

Ai sqaroi se insistimi për këtë burim energjie nuk lidhet me përfitime individuale. “Kërkesa për gazin amerikan ka karakter strategjik, nuk na takon neve si individë. Nuk kemi negociuar asnjë lloj pjesëmarrjeje në institucione apo në kabinetin qeveritar. E vetmja gjë që kërkojmë është që Kosova ta mirëpresë këtë mundësi, sepse vonesat nuk i lejojmë dot më,” deklaroi lideri i Aleancës.

Përtej sigurisë energjetike, dokumenti trajton reforma të tjera thelbësore në sferën ekonomike, bujqësore dhe infrastrukturore. Gjini bëri të ditur se kanë propozuar rritjen e pragut të qarkullimit për bizneset e vogla dhe të mesme nga 30 mijë në 100 mijë euro. Sipas tij, kufiri aktual po i mbyt ndërmarrjet, duke ua bërë të pamundur aksesin në kredi dhe punësimet e reja. Paralelisht, ai përmendi heqjen e taksës mbi pronën për të nxitur kultivimin e tokës dhe për t’u ardhur në ndihmë fermerëve, si dhe domosdoshmërinë që shteti të ndajë 1 miliard euro për kryeqytetin dhe të përmbyllë të gjitha projektet rrugore të nisura.

Kreu i Aleancës u shfaq i habitur nga indiferenca e gjithë skenës politike ndaj këtyre çështjeve që i konsideron jetike. Ai vuri në dukje se askush nuk është munduar as të pranojë, as të kundërshtojë publikisht asnjërën nga pikat. “Ajo që na çudit është se askush s’ka dashur të shprehet nëse këto janë të pranueshme apo jo. Nuk besoj se ka shumë vetë në Kosovë që mendojnë se këto janë gjëra të parëndësishme. Megjithatë, heshtja është totale. Sikur të dilnin e të thoshin ‘nuk e duam gazin amerikan’ e të shpjegonin pse, do të ishte ndryshe. Ndoshta i tremben ndikimit në vota, kjo është e kuptueshme,” tha Gjini.

Në mbyllje, ai i bëri apel klasës politike që të lërë pas grindjet e vjetra dhe të përqendrohet te projektet me ndikim të drejtpërdrejtë në jetën e njerëzve. “Tashmë kemi humbur mjaft kohë në politikën kosovare duke u marrë se kush ia hodhi kujt. Ne kemi vendosur të kërkojmë gjëra që u shërbejnë qytetarëve. Nuk i kërkojmë asgjë Albin Kurtit për vete, asnjëherë. Kjo është lista jonë. Mendoj që të gjitha partitë, si ato në opozitë ashtu edhe ajo që doli e para në zgjedhje, duhet të reflektojnë: a është e drejtë të qeverisësh duke e lënë vendin në errësirë?” përfundoi Ardian Gjini.