Arben Gashi: LDK-ja nuk pranon nënshtrim apo shantazh

Deputeti i LDK-së, Arben Gashi, ka thënë se ndryshimet në qëndrimet e partisë gjatë 18 muajve të fundit ua kanë vështirësuar votuesve të kuptojnë se çfarë përfaqëson ajo.

Në një postim, Gashi ka renditur kalimin nga qëndrimi se nuk do të bisedohej me Kurtin, te kërkesa për zgjedhje, më pas te synimi për bashkëqeverisje dhe, së fundi, te propozimi për ta zgjedhur bashkë Presidentin.

Sipas tij, gjatë kësaj kohe vendi ka kaluar nëpër tri palë zgjedhje dhe rrezikon të shkojë edhe në të katërtat, ndërsa mbetet pa qeveri dhe pa institucione funksionale. Ai tha se votuesit nuk mund të fajësohen për paqartësinë rreth drejtimit të LDK-së.

Gashi kritikoi edhe eksponentë të Vetëvendosjes, të cilët, sipas tij, po përpiqen t’ua atribuojnë gjashtë deputetëve të LDK-së dështimin për ta nënshtruar partinë dhe Kosovën. Ai ngriti pyetje për parimet, qëndrueshmërinë, drejtimin dhe idealin e LDK-së, duke theksuar se partia nuk pranon as nënshtrim, as shantazh.

Deputeti kërkoi kthim te parimet dhe te qytetarët, si dhe një LDK me politika, programe, aleanca e vizion për zhvillimin e vendit. Sipas tij, partia duhet të bashkëpunojë pa hequr dorë nga identiteti dhe parimet e veta, të jetë e qartë në qëndrime, e qëndrueshme në vendime dhe e besueshme në veprime.

Gashi e mbylli postimin me thirrjen që LDK-ja për të cilën ka nevojë Kosova të mos pritet, por të ndërtohet së bashku, tani.