Apeli shpall të pafajshëm ish-kryetarin e Malishevës, Ragip Begajn, dhe ish-ministrin Bajram Hasani

Gjykata e Apelit e ka ndryshuar vendimin e shkallës së parë të Gjykatës Themelore në Prishtinë, duke liruar nga akuzat Ragip Begajn, ish-kryetar i Malishevës, ish-ministrin Bajram Hasani, si dhe Bashkim Krasniqin e Malë Krasniqin.

Në shkallën e parë, Begaj dhe Hasani ishin dënuar me nga 2 vite e gjysmë burgim, ndërsa Bashkim Krasniqit dhe Malë Krasniqit u ishin shqiptuar dënime prej nga dy vitesh.

Ata ishin shpallur fajtorë për kryerjen në bashkëkryerje të veprës penale të keqpërdorimit të pozitës apo autoritetit zyrtar.

Rasti lidhej me pretendimet e Prokurorisë për planet e ndërtimit të Zonës Ekonomike të Malishevës.

Sipas Apelit, shqyrtimi i aktgjykimit të kundërshtuar, pretendimeve të paraqitura në ankesë dhe provave të administruara ka treguar se gjendja faktike për Ragip Begajn, Bajram Hasanin, Bashkim Krasniqin dhe Malë Krasniqin ishte përcaktuar në mënyrë të gabuar. Gjykata vlerësoi se nuk ishte dëshmuar që ata e kishin kryer veprën penale për të cilën qenë shpallur fajtorë.

Në njoftimin e Gjykatës së Apelit të Kosovës bëhet e ditur gjithashtu se, duke vepruar lidhur me ankesën e Prokurorisë Speciale të Republikës së Kosovës dhe sipas detyrës zyrtare, është ndryshuar aktgjykimi edhe në pjesën për të ndjerin Hajdin Berisha. Procedura penale ndaj tij është pushuar për shkak të vdekjes, ndërsa pjesa e ankesës që i referohej Berishës ka mbetur pa objekt.

Apeli, ndërkaq, e ka hedhur poshtë si të pabazuar ankesën e Prokurorisë Speciale dhe ka lënë në fuqi pjesën liruese të aktgjykimit për Faton Thaqin, Malë Krasniqin, Nazmi Kafexhollin dhe Ahmet Rrahmanajn.