Analistët: Tensionet brenda LDK-së mund të ndikojnë në krijimin e institucioneve

Lumir Abdixhiku, i cili e drejton Lidhjen Demokratike të Kosovës që nga marsi i vitit 2021, përballet sot me një nga sfidat më të mëdha për postin e tij në krye të partisë.

Në kuvendin e sotëm, LDK-ja do të vendosë jo vetëm për të ardhmen e Abdixhikut, por edhe për kursin politik që partia do të ndjekë në vazhdim. Kërkesa për shkarkimin e tij dhe thirrjen e kuvendit është mbështetur me nënshkrimet e 148 delegatëve.

Fjala përfundimtare, megjithatë, nuk u takon vetëm nismëtarëve, pasi në proces do të vendosin gjithsej 355 delegatë.

Pjesëtarët e pakënaqur të LDK-së e argumentojnë kërkesën për largimin e Abdixhikut me rezultatet në zgjedhje, si dhe me domosdoshmërinë për ndryshimin e drejtimit të partisë.

Njohësit e zhvillimeve politike vlerësojnë se situata pasqyron më tepër një kundërshtim të degëve ndaj Abdixhikut. Sipas tyre, brenda LDK-së mungon një figurë konsensuale që mund ta marrë udhëheqjen.

Për shkak të përplasjeve të brendshme, analistët shfaqin dyshime nëse LDK-ja do të jetë në gjendje të japë kontribut në formimin e institucioneve të reja së bashku me Lëvizjen Vetëvendosje.

Rruga e Abdixhikut drejt kreut të partisë u hap pas dorëheqjes së Isa Mustafës, e cila pasoi humbjen në zgjedhjet parlamentare të vitit 2021. Ky zhvillim nisi një proces të ri në partinë më të vjetër politike në vend, ndërsa Abdixhiku siguroi atëherë besimin e strukturave të LDK-së.

Pakënaqësitë ndaj udhëheqjes së tij u shtuan pas rezultatit të zgjedhjeve parlamentare të vitit 2025.

Për pasojë, në janar të këtij viti Abdixhiku iu nënshtrua një procesi votëbesimi brenda LDK-së, por arriti ta mbante postin e kryetarit.