Ambasadori francez u bën thirrje partive kosovare të nxjerrin vendin nga ngërçi politik

Përfaqësia diplomatike e Francës në Prishtinë organizoi të martën pritjen me rastin e Ditës Kombëtare Franceze.

Gjatë fjalës së mbajtur në këtë eveniment, ambasadori Olivier Guerot shprehu dëshirën që mbrëmja të kurorëzohej me fitoren e skuadrës franceze ndaj Spanjës në gjysmëfinalen e botërorit të futbollit, por nuk la pa përcjellë edhe një mesazh të qartë për klasën politike vendase lidhur me formimin e shpejtë të institucioneve.

Guerot u shpreh se, teksa përgatiste fjalimin, iu desh të rikthehej tek ai i vitit të shkuar ku gjeti një paragraf që fatkeqësisht mbetet po aq i nevojshëm edhe sot. Ai ritheksoi se aleatët ndërkombëtarë të Kosovës, përfshirë edhe Parisin zyrtar, kanë nevojë për bashkëbisedues të qëndrueshëm për të quar përpara marrëveshjet dhe për ta përcjellë vendin në rrugëtimin e tij drejt integrimeve evropiane.

“U bëj thirrje të gjithë liderëve politikë të këtij vendi, pa asnjë dallim, që t’i përkasin cilësdo force politike apo komuniteti, të gjejnë vetë shtegun e kompromisit dhe daljen nga kjo gjendje bllokimi me të cilën asnjë qytetar nuk është i kënaqur,” deklaroi ambasadori francez. Ai shtoi se ky apel për funksionim gjithëpërfshirës të institucioneve, pas një viti dhe dy cikleve zgjedhore, vijon të jetë më se aktual.

Në vijim të fjalës së tij, diplomati paralajmëroi se një përfaqësues i lartë i qeverisë franceze do të vizitojë së shpejti Prishtinën, një udhëtim ky që sipas tij do të shënojë nisjen e një faze të re dhe domethënëse për zhvillimin ekonomik të Kosovës, ku Franca synon të marrë një rol të spikatur.

Duke iu drejtuar kryeministrit në detyrë, ambasadori kujtoi pritjen e mëparshme në Pallatin Élysée dhe konfirmoi se ekipet po punojnë për të konkretizuar këtë vizitë. Gjithashtu, ai nënvizoi se Franca në Kosovë, si në çdo cep të botës, përfaqëson një aleat të përkushtuar, të vendosur, të besueshëm dhe solidar, duke sjellë me vete të njëjtat parime të së drejtës ndërkombëtare dhe multilateralizmit që mbron kudo.

Nga ana e tij, kryeministri në detyrë Albin Kurti vlerësoi kontributin shumëdimensional të Francës, duke theksuar se ajo e ka modeluar botën përmes letërsisë, filozofisë, shkencës dhe artit, po aq sa edhe nëpërmjet politikës e diplomacisë. Ai theksoi se ky ndikim është konkret edhe për Kosovën.

Kurti kujtoi se Republika e Kosovës, e dalë nga një luftë për liri e drejtësi, ka përqafuar demokracinë dhe sundimin e ligjit jo si shprehje boshe, por si shtylla themelore të shtetndërtimit. Ai e cilësoi Francën si një mike dhe partnere në çaste kyçe të historisë, që nga qëndrimi pranë popullit gjatë konfliktit, njohja e pavarësisë të nesërmen e shpalljes së saj, e deri te mbështetja e vazhdueshme për forcimin e demokracisë.

Sipas tij, partneriteti mes dy vendeve është bërë gjithnjë e më thelbësor, duke u materializuar në bashkëpunim konkret politik, institucional, kulturor dhe arsimor. Kryeministri në detyrë përmbylli duke nënvizuar se rruga drejt Bashkimit Evropian mbetet një vendim i ndërgjegjshëm demokratik dhe një disiplinim i domosdoshëm institucional për të zënë vendin e natyrshëm mes kombeve të kontinentit.