Aleanca kallëzon në Prokurorinë Speciale vendimet e Qeverisë në detyrë

Aleanca ka paraqitur kallëzim penal në Prokurorinë Speciale në Prishtinë për vendimet e Qeverisë në detyrë, të cilat i ka cilësuar si antikushtetuese.

Besnik Tahiri, nënkryetar i Aleancës, deklaroi se 17 vendimet që lidhen me caktimin e komisioneve për rekrutimin e zyrtarëve të lartë shtetërorë bien ndesh me Ligjin për Qeverinë.

Sipas Tahirit, kabineti qeveritar në detyrë, i drejtuar nga kryeministri në detyrë Albin Kurti, ka kompetenca të kufizuara. Ai pretendoi se vendimet e miratuara në mbledhjen e 12 gushtit cenojnë legjislacionin në fuqi dhe rregulloret e ekzekutivit, të cilat përcaktojnë fushëveprimin e një qeverie në detyrë.

Tahiri shpjegoi se, sipas vlerësimit të Aleancës dhe juristëve që e përfaqësojnë këtë çështje, vendimet e marra më 12 gusht të këtij viti janë në kundërshtim me ligjin dhe me rregulloret që rregullojnë punën e qeverisë.

Ai theksoi se një qeveri quhet në detyrë pikërisht sepse nuk është e votuar dhe, për këtë arsye, nuk lejohet të marrë vendime si 17 aktet për emërimin e komisioneve që do të rekrutojnë zyrtarë të lartë shtetërorë në agjencitë qeveritare.

Sipas tij, ekzekutivi në detyrë nuk mund ta shkelë ligjin që e ka miratuar vetë. Tahiri tha se kufizimi i kompetencave të kësaj qeverie është përcaktuar shprehimisht dhe pretendoi se, përmes këtyre vendimeve, zyrtarët kanë cenuar detyrën zyrtare dhe pozitën e tyre si ushtrues detyre.

Nënkryetari i Aleancës ngriti gjithashtu çështjen e roleve të dyfishta që, sipas tij, vazhdojnë t’i ushtrojnë shumica e anëtarëve të kabinetit qeveritar, të cilët njëkohësisht janë edhe deputetë të zgjedhur.

Tahiri argumentoi se një deputet që është betuar në Kuvend nuk mund të mbajë paralelisht një funksion në pushtetin ekzekutiv, qoftë si ministër apo si zëvendësministër në detyrë.

Ai tha se kjo çështje është përfshirë edhe në kallëzimin penal, pasi ligji ia ndalon një deputeti të betuar ushtrimin e një detyre tjetër ekzekutive. Sipas tij, një person nuk mund të betohet paradite në seancë si deputet dhe më pas të vazhdojë punën në qeveri si ministër në detyrë.

Tahiri e konsideroi këtë një shkelje të rëndë ligjore, duke shtuar se një situatë e tillë është sanksionuar edhe përmes një vendimi tjetër të Gjykatës Supreme. Në përfundim, ai kërkoi ndaljen e kapjes së shtetit dhe të abuzimit me funksionin publik.

Rezerva ndaj vendimmarrjes së Qeverisë në detyrë kanë shprehur edhe organizata të shoqërisë civile. Përmes një komunikate për media të publikuar më 13 gusht, Grupi për Studime Juridike dhe Politike i vlerësoi vendimet si të kundërligjshme, me arsyetimin se shumica e anëtarëve të Qeverisë në detyrë janë betuar si deputetë të Kuvendit të Kosovës.

Zgjedhjet e jashtëzakonshme parlamentare në Kosovë u mbajtën më 7 qershor, ndërsa deputetët e dhanë betimin më 6 gusht. Megjithatë, Kuvendi ende nuk është konstituuar, pasi nuk janë zgjedhur kryetari dhe nënkryetarët.