Aksidenti me dy viktima në Shushicë, Ferati ngushëllon familjen Qorraj

Ilir Ferati, kryetar i Istogut, i ka shprehur ngushëllime familjes Qorraj pas aksidentit të rëndë në Shushicë të Istogut, në të cilin humbën jetën dy persona, mes tyre edhe një fëmijë.

Ai e cilësoi ngjarjen si një fatkeqësi që ka pikëlluar të gjithë qytetin. Ferati shprehu solidaritetin me familjarët e viktimave dhe u lut për shërimin e personave të tjerë të përfshirë në aksident.

Kryetari i Istogut kërkoi gjithashtu më shumë kujdes gjatë drejtimit të automjeteve, sidomos kur kushtet atmosferike janë të vështira.

Ferati shkroi se humbjet e jetëve të shënuara sot kanë shkaktuar tronditje të thellë. Sipas tij, pas aksidentit tragjik në Shushicë të Istogut fillimisht u bë e ditur vdekja e menjëhershme e një fëmije, ndërsa më vonë u njoftua se kishte ndërruar jetë edhe një anëtar tjetër i së njëjtës familje. Ai tha se kjo tragjedi e ka shënjuar ditën e sotme dhe ka trishtuar të gjithë, duke i përcjellë familjes Qorraj ngushëllimet më të sinqerta për humbjet. Ferati uroi shëndet për të lënduarit e tjerë dhe theksoi se thirrja për kujdes në trafik duhet të respektohet gjithmonë nga të gjithë, veçanërisht në rrethana të tilla atmosferike.