Abrashi tregon kushtin që mund ta çojë Vlora Çitakun në krye të Kuvendit

Artan Abrashi, deputet i LVV-së, ka thënë se edhe Vlora Çitaku nga PDK-ja mund ta marrë drejtimin e Kuvendit.

Në një reagim në Facebook, ai riktheu në vëmendje propozimin që Albin Kurti ia kishte paraqitur Bedri Hamzës.

Sipas Abrashit, Vlora Çitaku mund të zgjidhet kryetare e Kuvendit nëse Bedri Hamza e pranon ofertën e Albin Kurtit. Ai shkroi se PDK-ja do ta siguronte postin e kryeparlamentarit vetëm me kusht që të mos pengonte zgjedhjen e presidentit të ri.

Në letrën më të fundit drejtuar Hamzës, Kurti, ndër të tjera, i përsëriste ofertën për shkak të refuzimit të takimit.

Kurti shprehej se, në këmbim të qëndrimit në sallë dhe pjesëmarrjes në votimin për President/e të ri/e të Republikës, ishin të gatshëm të bënin rokadë mes postit të nënkryetarit/es së Kuvendit që i takon PDK-së dhe pozitës së kryetarit/es së Kuvendit nga LVV-ja. Sipas tij, ky do të përbënte kontribut nga Hamza, ndërsa PDK-ja do të përfitonte drejtimin e njërës prej tri pozitave të larta politike shtetërore në Republikën e Kosovës.