Auditori gjen shkelje të shumta në QKUK, ka drejtor njësish me vetëm 23 vjet (VIDEO)

Mijëra euro të destinuara për kujdestari janë paguar në QKUK për administratë. Një gjë e tillë është evidentuar në raportin e brendshëm të këtij institucioni.

Sipas auditorit, administrata e QKUK-së nuk kujdestaron dhe puna jashtë orarit kalkulohet ndryshe e jo me kujdestari. Ky raport ka gjetur shumë parregullsi.

Në mesin e tyre ka identifikuar probleme në administratën e spitaleve publike.

Persona në moshë shumë të re janë emëruar në pozita udhëheqëse, njëra 23-vjeçare e tjetra 26. Një gjë të tillë auditori i brendshëm e ka vlerësuar të jashtëligjshme, raporton KOHA.

Në ShSKUK në vitin 2018 janë “shpikur” pozita të cilat nuk janë në organogram.

Menaxhmeti i ShSKUK-së ka avancuar stafin mjekësor përtej kompetencave profesionale.

Raporti ka përmendur një kirurg, i cili është shef njësie në një klinikë tjetër e një kryeinfermiere pa ushtruar asnjë ditë detyrat dhe obligimet e saj në atë njësi.

Një nga çështjet që është me së shumti e theksuar në këtë raport është pagesa e produkteve. Në 11 lëndë të testuara nga auditori, njësia kërkuese fare nuk kishte interes për ato blerje, në më shumë se 65 për qind të rasteve, fatura është pranuar para se mjetet të zotoheshin, dhe në 97 për qind të rasteve nuk kishte fare urdhër-blerje.

Auditori i brendshëm ka identifikuar shumë probleme tek përdorimi i veturave zyrtare në këtë institucion.

Konkluzioni i këtij raporti është se nuk mund ta sigurojnë menaxhmentin sa i përket menaxhimit të veturave.

Në këtë pikë auditori ka gjetur disa probleme, siç janë: shfrytëzimi i veturave jashtë orarit të punës pa autorizim, mosaplikimi i kërkesës për përdorim të automjetit, si dhe mungesa e formularëve të fletudhëtimit.

KOHA ka raportuar se në këtë raport janë evidentuar edhe shkelje të tjera e që lidhen me shuma të mëdha parash të shpenzuara në marketing, dyshime për pagesat e parkingut e numri i vogël i rasteve që paguajnë shërbime në QKUK.