Zidane para “El Clasiccos”: Barcelona varet nga Messi

Zizu thotë se Barça është më e dobët pa Messin në ekip. Sido që të jetë, ai s’po brengoset për kundërshtarin, por se çfarë do të bëjë ekipi i tij.

Të dielën, në ‘Santiago Bernabeu’, Real Madridi dhe Barcelona do t’i matin forcat për herë të dytë këtë edicion, pas barazimit 0-0 në sfidën e parë në ‘Camp Nou’.

Për dallim nga sfida e kaluar, tani pikët janë më me rëndësi në luftën për titull, me Barcelonën që prin me 2 pikë më shumë se Reali.

Në ‘Bernabeu’ do të zbresë një ndër më të mirët në histori, Lionel Messi, që gjithmonë ka shënuar në shtëpinë e madrilenve.

Zinedine Zidane, në konferencë para kësaj ndeshje ka deklaruar se Leo gjithmonë e bën diferencën për Barçën dhe se pa të, Barcelona është tjetër skuadër.

“Barcelona varet shumë nga Messi? E dimë rëndësinë e Messit në ekipin e tij. A mund të jenë më të dobët pa të, natyrisht që po, kjo është e sigurt, ai është vendimtar për ta. Por në përgjithësi janë të mirë. Si një grup bëjnë punë të mirë. Megjithatë ne brengosemi për veten, se çfarë do të bëjmë ne”, u shpreh Zizu.

“A është në pikëpyetje vazhdimi juaj në Madrid nëse nuk e fitoni një trofe? Nuk e di, duhet t’i pyesni të tjerët”.