Ndeshja e parë në drejtimin e Barcelonës, Koeman: Trincao blerje e shkëlqyer, Messi duhet të përmirësohet fizikisht

Ronald Koeman dha përshtypjet e tij për testin e parë parasezonal midis Barcelonës dhe Nastic, që përfundoi 3-1 për “blaugranat”.

Loja: Gjëja më e mirë është që secili ishte në gjendje të luante 45 minuta, sepse ende nuk kemi kondicion fizik. U panë gjëra të mira te dy golat e parë dhe lojërat në krah, ku është përdorur hapësira. Në pjesën e dytë mund të shënonim më shumë gola. Të gjithë lojtarët përfunduan mirë, pa probleme dhe kjo është shumë e rëndësishme.

Taktika: Ne kemi punuar shumë në aspektin fizik në seancat stërvitore që kemi bërë deri më tani dhe tani e tutje duhet të bëjmë më shumë gjëra në aspektin taktik.

Pedri: Ai është talent i madh, është vetëm 17-vjeç dhe e konsideroj një nënshkrim i rëndësishëm për të ardhmen. Ai është stërvitur me ne dhe ka cilësi për të luajtur. Të shohim se sa mund të marrë pjesë në lojën tonë.

Trincao: Më pëlqeu, bëri paraqitje pozitive, herë duke hyrë nga brenda dhe herë nga jashtë. Ka cilësi dhe duhet t’i përshtatet shpejtësisë dhe ritmit të topit. Është blerje e shkëlqyeshme.

Messi: Ka treguar të njëjtën frymë si ditën e parë. Ai po stërvitet mire dhe e ka bërë edhe kur mori pushimet. Ai e di shumë mirë që duhet të përmirësohet fizikisht si gjithë të tjerët. Cilësia e tij flet vetë.