“Me hidhërim të thellë”, sindikata e Futbollistëve kryqëzon asamblenë e FSHF-së

Sot u zhvillua asambleja e zakonshme e futbollit shqiptar, ku u morën edhe disa vendime. Megjithatë, axhenda e punimeve nuk e ka lënë të kënaqur Andi Lilën, ish-futbollistin e kombëtares, që tani drejton Shoqatën e Futbollistëve Profesionistë Shqiptarë. Madje, gjithçka ndodhi, kavajasi e përcjell publikisht… “me hidhërim të thellë”. Ja statusi i tij në Facebook, vetëm pak minuta pasi uli siparin kjo asamble e FSHF-së, e zhvilluar online:

“Me keqardhje të thellë ndoqa sot punimet e Asamblesë së FSHF-së. Kjo, jo vetëm për mënyrën e organizimit, por edhe për disa nga vendimet që mori. Më erdhi keq për Kamzën, që tani nuk është anëtare e Asamblesë së FSHF-së dhe rrjedhimisht, as stadium nuk duhet të ketë.
Më erdhi keq që në asnjë moment në këtë Asamble nuk u përmend se Sindikata e Futbollistëve Shqiptare ka kërkuar nisjen e bisedimeve për kontratën kolektive.
Më erdhi shumë keq që as drejtori i departamentit juridik të FSHF-së, z.Alibeaj, megjithëse ka një kopje të kontratës kolektive, nuk tha asnjë fjalë për të.
Sot kam disa pyetje për ju, z.Alibeaj:
Këto ndryshime që ju propozuat dhe Asambleja i miratoi, kujt i shërbejnë?
Përfaqësuesit e futbollistëve në këto komisione, përsëri FSHF-ja do t’i caktojë?
Z.Alibeaj, si jurist me eksperiencë që jeni, a mund të më thoni, edhe publikisht, se kontrata kolektive e propozuar nga ana e sindikatës tonë, a është në të mirë të futbollit apo e dëmton atë?
Z.Alibeaj, ju që vini nga radhët e të persekutuarve, a mund të më thoni se cilët janë më të persekutuarit në futbollin shqiptar…
Më erdhi shumë keq që në Asamblenë e FSHF-së, ku duhet të qahen edhe hallet e futbollit, asnjë nga klubet nuk foli, ndërsa në studio televizive bëjnë namin.
Të nderuar presidentë dhe përfaqesues të klubeve: nëse nuk diskutuat sot për vështirësitë reale financiare që po kaloni, për penalizimet që keni marrë nga arbitrat, për reformën ekonomike në sport, e cila ka ngecur, apo për privatizimin e klubeve në varësi të bashkive, cilat janë hallet e vërteta të futbollit? Pastaj, nuk keni të drejtën morale të ankoheni as në studio televizive dhe as në qeveri.
Dhe gjëja e fundit, për të cilën më erdhi keq, ishte fakti se gjithmonë votuan pro 99.99 % e anëtarëve të asamblesë.
Më vjen shumë keq ta besoj se asambleja e FSHF-së do të ketë votim real vetëm kur zgjidhet Presidenti dhe Komiteti Ekzekutiv, votim për interes individual. Ndërsa kur votohet për futbollin, votohet sikur në Shqipëri futbolli nuk ka asnjë problem”.