Mane i “etur” për sukses, karikon Liverpoolin: Do sakrifikojmë deri kur të sigurojmë trofetë

Sadio Mane dëshiron ta shtojë edhe një medalje të artë të Premierligës dhe një të Ligës së Kampionëve në koleksionin e tij me Liverpoolin dhe thotë se nuk do të pushojë derisa ta arrijë këtë qëllim.

12 muajt e fundit kanë qenë të paharrueshëm për Liverpoolin, pasi “Reds” arritën të triumfojnë në Ligën e Kampionëve, Superkupën e Evropës dhe në Kupën e Botës për Klube.

Skuadra e Jurgen Kloppit gjithashtu e ka siguruar një epërsi prej 13 pikësh në krye të tabelës së Premierligës, me dy ndeshje më pak të zhvilluara sesa kundërshtarët, dhe pritet që këtë sezon t’i japin fund pritjes 30-vjeçare për t’u shpallur kampionë të Anglisë.

Megjithatë, Mane thotë se ai s’do ta nënvlerësojë askënd dhe asgjë derisa Liverpooli t’i sigurojë titujt e Premierligës dhe Ligës së Kampionëve këtë sezon.

“Derisa skuadra të jetë e suksesshme dhe unë të jem i suksesshëm, mendoj se është e nevojshme ta sakrifikoj veten dhe të jap gjithçka të mundur për skuadrën. Skuadra do të ma kthejë këtë besoj, secili lojtar”, ka thënë 27-vjeçari.

“Sigurisht që kemi arritur gjëra të mëdha vitin e fundit, por duam të arrijmë edhe më shumë gjëra me këtë klub. Dëshirojmë të fitojmë sërish trofe, Premierligën, Ligën e Kampionëve. Kjo nuk do të jetë e lehtë, të gjithë e dimë. Por, ne e kemi parë gjatë viteve të fundit që gjithçka është e mundur dhe ne mund ta arrijmë këtë sërish. Ne thjesht duhet të jemi të uritur në një aspekt të mirë dhe ta shtyjmë veten deri në fund”, tha sulmuesi i Liverpoolit.