Dështoi me David Silvën, Tare nis negociatat me një tjetër lojtar të Man.City-t

Pasi dështoi në momentet e fundit për të sjellë në Romë fantazistin spanjoll David Silva, Igli Tare po punon për të vënë në dispozicion të trajnerit Simone Inzaghi një tjetër futbollist nga Manchester City.

Bëhet fjalë për mbrojtësin argjentinas Nicolas Otamendi, i cili nuk bën më pjesë në planet e Pep Guardiolës dhe pritet të lërë Manchesterin, ndërsa Tare është vënë menjëherë në lëvizje për ta veshur bardhekaltër.

Kartoni i Otamendit vlerësohet rreth 5 milionë euro dhe vetë mbrojtësit, Tare është gati t’i ofrojë 10 milionë euro në total për 3 sezone, ndërsa sipas raportimeve të mediave italiane, negociatat janë në fazë të avancuar dhe shumë shpejt mund të vijohet me hapa konkretë.

Me Otamendin Lazio do të përforconte ndjeshëm prapavijën, aq më tepër këtë vit që rivaliteti në kampionatin italian është rritur ndjeshëm dhe skuadra bardhekaltër do të duhet të përfaqësohet denjësisht edhe në Ligën e Kampionëve.

Kujtojmë që në muajin gusht klubi italian arriti një marrëveshje edhe me fantazistin spanjoll David Silva, por në mënyrë të befasishme ky i fundit vendosi të transferohet në kampionatin spanjoll, duke zgjedhur Real Sociedadin për të vijuar karrierën.