Courtois: U rrita si portier duke parë Casillas

Gardiani aktual i Real Madridit, Thibaut Courtois ka zbuluar disa detaje interesante nga fëmijëria e tij.

Courtois, i lindur në Belgjikë, bëri një rrugëtim të gjatë e të suksesshëm dhe tashmë mbron fanellën e Real Madrid, ku është zgjedhja e parë për portën.

Belgu ka zbuluar edhe emrat që e kanë motivuar atë që të rritet si portier, dhe një nga ta ishte pikërisht ikona e skuadrës që aktualisht mbron ngjyrat e saj, Iker Casillas.

“Kur Iker filloi të luante për Madridin, unë shikoja ndeshjet e tij dhe u bëra portier për atë. Më pëlqente ta shikoja atë dhe e doja Real Madridin”, ka thënë Courtois.

“Kur e pash atë isha 14 vjeçar. Më pëlqente edhe Van der Sar, ishte stili im”, ishin fjalët e belgut.

Courtois ka pasur uljet dhe ngritjet e tij në ‘Santiago Bernabeu’ – disa herë duke qenë edhe subjekt i kritikave – por tashmë ka rifituar pozitën e tij.