Ancelotti kërkon me ngulm mbrojtësin e Barcelonës, Everton gati të paguaj 25 milion euro

Jean-Clair Todibo vijon të jetë një nga emrat më të lakuar të merkatos së Barcelonës, pasi mbrojtësi francez nuk bën pjesë në planet e katalanëve dhe klube të shumta europiane janë vënë pas tij për ta blerë gjatë verës.

Deri në fund të këtij sezoni, mbrojtësi i talentuar francez do të jetë pjesë e Schalke 04-ës në Bundesligë, ku u transferua me formulën e huazimit në janar, por duket se tashmë ëshët bindur për një transferim final.

Së fundi në garë për Todibo është futur Evertoni, pasi trajneri Carlo Ancelotti ka piketuar francezin si njeriun e duhur për prapavijën, ndërsa anglezët janë gati të paguajnë një shifër prej 25 milionë eurosh për kartonin e tij.

Gjasat janë që operacioni të mbyllet me sukses, pasi Barcelona kërkon para kesh për të sponsorizuar merkaton e verës, ndërsa Todibo do të gjejë një klub ku i besojnë dhe mund ta hedhin në fushë rregullisht e ta ndihmojnë në procesin e rritjes.