Zhurmë e zhul në hotel, infermierja shqiptare: Nuk pati festë në hotel!

Misioni i 30 mjekëve dhe infermierëve shqiptarë në Itali nuk përfundoi në mënyrë të këndshme.

Ata u akuzuan nga pronari i hotelit në Brescia se shkaktuan zhurmë në hotel dhe nuk respektuan distancimin.

Infermierja Linda Hasa, e cila ishte pjesë e ekipit, përgjatë një interviste për “Abc News”, theksoi se nuk pati festë në hotel, por sipas saj spitali civil u organizoi thjesht një koktejl për t’i falenderuar.

“Nata jonë në hotel ishte shumë e bukur sepse na bënë ftesë eprorët e spitalit civil për të na falënderuar. Aty na kishin përgatitur edhe një koktejl, na falënderuan.

Mbaroi dhe shkuam në hotel. Morëm darkën. Më pas një grup cunash ishin miqësuar shumë. Nuk është përdorur pije alkoolike në hotel. Koktejin e kemi bërë në spital.

Ishte nata e fundit dhe ishin të gjithë të gëzuar. Ishim të gëzuar se dolëm edhe negativë me tamponin.

Kemi kënduar. Kënduam edhe para spitalit civil, këngën “ku ka si Shqipëria ime”. Edhe aty mund të kemi kënduar një këngë më shumë. Mund ta kenë ngritur zërin, por nuk dëgjohej shumë.

Është thënë që me veprimin që u bë se u këndua, atyre 9 personave u është thënë se mund të gjobiteni, por nuk është vënë gjobë. Ulërima nuk kishte. Nga personeli jemi lavdëruar. Festa ka qenë në spital dhe nuk ka pasur në hotel”, u shpreh ajo./abcnews