VV-ja kthehet në opozitë, nis përplasjet me LDK-në (VIDEO)

Kryeparlamentarja Vjosa Osmani ka udhëhequr seancën e së enjtes, për dallim nga bojkotimi që i bëri seancës të së mërkurës, ku u votua Qeveria e re me Avdullah Hotin kryeministër.

Që në seancën e parë të kësaj legjislature në opozitë, Vetëvendosje e LDK, dikur partnere në Qeveri, janë përplasur në Kuvend, raporton KOHA.

Në deklarimet jashtë rendit të ditës, deputeti Liburn Aliu ka thënë se LDK-ja erdhi në pushtet jashtëligjshëm dhe duke e forcuar Serbinë në Kosovë përmes Listës Serbe.

Aliu ka akuzuar LDK-në se arriti të krijojë Qeverinë me ndihmën e presidentit Hashim Thaçi, duke bërë presion te deputeti i Nismës, Haxhi Shala.

Por, i menjëhershëm ishte reagimi i shefit të deputetëve të LDK-së, Arben Gashi. Ai ka ironizuar, duke thënë se tashmë ky është realiteti i ri politik.

Përplasjet Vetëvendosje-LDK i vazhduan edhe deputetë të tjerë të këtyre partive.

PDK-ja përmes shefit të deputetëve të saj ka kritikuar Qeverinë e kaluar për mungesë të përkrahjes së bizneseve gjatë pandemisë. Bedri Hamza ka thënë se kanë ofruar projektligje e ide për daljen nga kriza, por nuk ka gjetur përkrahje.

Pas këtij fjalimi, kryeministri Avdullah Hoti me gjasë i kërkoi Vjosa Osmanit të marrë fjalën, por kjo e fundit duket se e injoroi atë.

Kryetarja e Kuvendit, Vjosa Osmani, ka njoftuar se nga data 3 qershor Grupi Parlamentar 6 + nuk ekziston më, pasi deputetja Zikreta Aliti ka dhënë dorëheqje.

Për t’u krijuar Grupi parlamentar nevojitet të jenë së paku 6 deputetë.