Shpërthimi në Bejrut: Gruaja heroinë i shpëton jetën burrit të ngecur nën rrënoja

Ditën e djeshme Bejrut u shkretua nga një shpërthim i fuqishëm i cili ka shkaktuar 108 viktima, e mbi 4000 të plagosur.

Pas tragjedisë, një e mbijetuar ka rrëfyer përjetimin e saj dhe “luftën” për të shpëtuar bashkëshortin e mbetur nënë rrënoja.

Chadia Elmeouchi-Noum ka treguar për BBC se si ajo ka vrapuar mes xhamave të thyer për të shpëtuar bashkëshortin e saj, Anthony. Ky i fundit kishte mbetur i izoluar nën rrënoja pas shpërthimit.

“Kishte xhama kudo, por nuk më interesonin dhimbjet e shkaktuara, për mua e rëndësishme ishte të shpëtoja burrin. E gjeta mes rrënojave.

Ai nuk reagonte, kishte gjak kudo. Burri kishte një pjesë të dritares mbi kokë dhe një pjesë të murit mbi kokë.

I rridhte gjak nga koka. Unë u përpoqa që të ndaloja gjakderdhjen, por ishte e kotë. Kërkova ndihmë, por askush nuk arriti të më dëgjonte”, tha ajo.

Ajo shton më tej, se një i huaj i kishte ofruar ndihmë dhe me makinën e tij e kishte dërguar burrin në spital.

“Rrugët ishin të shkreta. Kishte njerëz kudo. Ne e dërguam në spital Anthonyn dhe disa minuta më vonë ata e futën në dhomën e urgjencës e nuk na lejuan që të futeshim brenda.

Ata u përpoqën që të largohesha, por unë u fsheha në një dollap. Nuk doja të shkoja, doja të sigurohesha që ai ishte mirë. Tani është operuar në tru dhe jam duke pritur jashtë dhomës ku është”, deklaroi ajo.