Të riatdhesuarit do të karantinohen në hotel, dy rastet që bëjnë përjashtim

Ministrja e Infrastukturës dhe Transportit, Belinda Balluku njoftoi në një lidhje direkte në emisionin “Opinion” në lidhje me procesin e riatdhesimit për shqiptarët në shtete të ndryshme të botës.

Ministrja tha se çdo qytetar shqiptar që do të hyjë në territorin shqiptar do të karantinohet për 2 javë në një hotel me përjashtim të dy rasteve kur janë të sëmurë ose kur janë minorenë.

“Çdo qytetar që është në kushte të mira shëndetësore do të karantinohet. Por ka dy raste përjashtimore nëse ka një diagnozë mjeksore që nuk e lejon të karantinohet në hotel dhe atëherë do të shkojë në shtëpi dhe do të karantinohet e gjithë familja për 14 ditë. Rasti tjetër janë minorenët. Ata do të dërgohen në shtëpi dhe e gjithë familja do të karantinohet për 14 ditë”, tha ministrja.

Balluku tha se aktualisht rastet problematike janë 55 shtetasit shqiptarë në Arabinë Saudite, pasi nuk po gjendet një zgjidhje për t’i afruar diku këta shtetas.

Ajo shtoi gjithashtu se janë 35 punonjës shqiptarë në Katar që kanë ngecur dhe kadetët në Turqi për të cilët po punohet për t’i afruar.

Sa i përket shqiptarëve në vendet nordike ministrja tha se ata do të riatdhesohen si pjesë e një pakete të përbashkët që po përgatitet.

“Vendet nordike janë duke u analizuar si paketë. Suedia së bashku me Norvegjinë dhe Finalnën. Kjo është dicka që do të zgjidhet në grup”, tha Balluku.

Ministrja Balluku njoftoi se të gjithë shqiptarët në botë që kërkojnë të rikthehen duhet të shikojnë ku e kanë pikën më të afërt të udhëtimit me aeroportet nga do të kryehen fluturimet e riatdhesimit.