Reshje shiu e shtrëngata, si pritet të jetë moti ditën e diel

Reshjet e shiut do të vijojnë të jenë prezente në vendin tonë edhe ditën e nesërme.

Sipas Shërbimit Meteorologjik Ushtarak, gjatë ditës së nesërme pritet disi një përmirësim i situatës meteorologjike, teksa do të ketë reshje të herëpashershme e të dobëta.

“Moti parashikohet të jetë kryesisht i kthjellët me vranësira kalimtare përgjatë orëve të mesditës. Reshjet e shiut do të jenë të herëpashershme të dobëta në veriperëndim dhe jug, hera herës në formë shtrëngatash”, thuhet në njoftimin e Shërbimit Meteorologjik Ushtarak.

Dita e Hënë dhe ajo e Martë parashikohen të kenë përsëri mot të vranët me reshje shiu me intensitet mesatar deri dhe të lartë.

Ndërkohë gjatë ditës së sotme sasia më e lartë e reshjeve u regjistrua në qytetin e Elbasanit me 45.0mm, Tiranë 41.2mm, Shkodër dhe Lezhë me 38.0 dhe 35.0 përkatësisht, Kukës 30.2mm dhe në stacionet e tjera më pak se kjo sasi reshjesh.

Gjithashtu sot ka patur edhe erë intensive me drejtim nga kuadrati i jugut dhe shpejtësi të regjistruar në stacion deri në 15m/s. Por përgjatë vijës bregdetare dhe vendndodhje të caktuara era hera herës ka arritur dhe shpejtësi deri në 20m/s.