Rama në kërkim të mandatit të tretë: Shqiptarët nuk kanë një alterantivë më të mirë se mua

Kryeministri Edi Rama gjatë një fjalimi pas mbledhjes së grupit parlamentar të Partisë Socialiste ka deklaruar se tashmë po punojnë për një mandat të tretë.

Rama theksoi se është i gatshëm tu provojë shqiptarëve se ka shumë ambicie për të bërë më tepër për vendin dhe se sipas tij nuk kanë një alternativë më të mirë.

Fjala e Ramës

Këtu jemi mbledhur që t’ju ftoj në një reflektim të thellë dhe të shpejtë. Të cilin dua që ta nisim për ta kryer në javët e ardhshme.

Si do ta kurorëzojmë këtë mandat me bindje për të tretën herë radhazi, për herë të parë në Shqipërinë pluraliste. Po e nis nga vetja, se çfarë duhet të bëj më shumë dhe më mirë këtë sezon për merituar respektin e atyre që më besuan të bindur për të drejtuar shtëpinë.

Shqiptarët e kanë të qartë që nuk e kanë sot për sot një kryeministër më të mirë, por a jam unë kryeministri më i mirë që unë mund të jem për ta. Po ju a jeni deputetët më të mirë? A është kjo që kemi deri më sot secili prej nesh më e mira që ne mund të bëjmë për to.

Shqiptarët sot nuk e kanë një alternativë më të mirë sesa mua dhe sa ju që na vunë në krye të vendit tre vite më parë. Shumica e tyre nuk e diskutojnë. Por kjo sot nuk më mjafton fare dhe atyre jo e jo që nuk u mjafton. PS mund të bëjë në krye të vendit më shumë sesa kaq që kemi bërë deri këtu. Përgjigja është po! Dhe patjetër përderisa unë jam këtu dhe kam ndërmend të kërkoj një mandat tjetër, mund të bëj më shumë akoma. Ndryshe nuk do të kisha arsyen themelore që kam për të vazhduar më tutje. Secili prej jush mund ta mendoje dhe ta thojë këtë.

Unë jam i gatshëm t’ua provoj shqiptarëve se kam në fakt edhe më të madhe dëshirë ambicien për të bërë më shumë për ta dhe uroj që dhe ju të jeni të gatshëm. Me timen kam bërë gjithçka kam mundur dhe jo gjithçka kam dashur.