Rama kundër kritikave: Virusi nuk është tank që mund ta ndalojmë

Kryeministri Edi Rama tha se vendet e tjera po veprojnë më ngadalë me masat kundër përhapjes së koronavirusit.

Në përgjigje të kritikave se pse kufijtë nuk u mbyllën më parë, kreu i qeverisë solli rastin e Britanisë së Madhe si një vend që nuk ka mbyllur ende shkollat.

“Ata që thonë se kufijtë duhet të ishin mbyllur më përpara e kanë gabim. Shikoni vendet e tjera po veprojnë më ngadalë se sa ne. Amerika e ka shumë më të shfaqur situatën e problematikës dhe i mbylli vetëm dje.

Britania e Madhe as shkollat dhe universitetet nuk ka vendosur t’i mbyllë. Janë strategji të njëjta dhe plane taktike të ndryshme. Të shikojmë rezultatet kush ka më shumë apo më pak të drejtë”, tha Rama.

“Nuk ka arsye të merret masë sot në Berat. Të gjithë duhet të ndjekin këshillat e autoriteteve shëndetësore. Nuk ka arsye për të përshkallëzuar masat sepse nuk përshkallëzohen masat me idenë se virusi do shkojë në Berat sepse virusi nuk është një tank dhe do t’i bllokojmë rrugën.

Virusi do shkojë kudo ku ka për të shkuar. Nuk e pengon virusin të shkojë të gjitha këto që ne flasin dhe ne po bëjmë.

Ngadalësojmë avancimin dhe shpërndarjen e tij në përfitim në dy drejtime të rëndësishme: afrimi i temperaturave më të larta dhe besohet që do të ulë agresivitetin e virusit.

Kjo është luftë. Nuk e kemi armikun përballë të armatosur deri në dhëmbë.

E kemi në ajër dhe synon të hyjë në trup dhe të kapë hallkën më të dobët, nënën e sëmurë dhe të bëjë atë që kurrë nuk duhet ta lejojmë me mendjelehtësinë tonë apo frikën tone”, shtoi ai.