KLGJ jep dy vendime: Çfarë po ndodh me kandidaturat e emërimeve në Gjykata

KLGJ ka miratuar sot kandidaturat për vendet vakante në Gjykatën e Posacme të Shkallës së Parë dhe Apelit, si dhe ato të kandidatëve magjistratë për të vijuar garën.

Në vazhdim, KLGJ do të vijojë me hapa të tjerë deri në shpalljen e fituesve dhe emërimin në gjykata. Në rastin e Gjykatës së Lartë, janë 8 kandidatë në garë për katër vende vakante.

Në funksion të plotësimit të vendeve vakante në Gjykatën e Posaçme të Shkallës së Parë dhe atë të Apelit për Korrupsionin dhe Krimin e Organizuar, KLGJ miratoi vendimet për plotësimin e katër kritereve për ngritjen në detyrë në këto gjykata nga kandidatët z. Erjon Çela, znj. Miliana Muça, znj. Daniela Shirka dhe znj. Iliriana Olldashi si dhe vijimin e procedurës së verifikimit për kriteret e tjera ligjore të kandidimit të tyre.

Gjithashtu në vijim të rendit të ditës, në kuadër të ecurisë për ringritjen dhe funksionalitetin e plotë të Gjykatës së Lartë, KLGJ miratoi vendimet për verifikimin e plotësimit të tre kritereve të kandidimit për ngritjen në detyrë në këtë gjykatë për kandidatët magjistratë përkatësisht z. Klodian Kurushi, z. Sokol Ibi, znj. Albana Boksi, znj. Alma Hicka, znj. Klodiana Veizi, znj. Manjola Xhaxho, z. Gent Medja dhe z. Sokol Ngresi.