I vdiq burri, vjehrra dhe kunati nuk lejojnë nënën e dy fëmijëve të futet në shtëpinë e saj

Programi “Historia ime”, në TV Klan solli ditën e sotme historinë e nënës së dy fëmijëve. Jeta ka qenë tepër e vështirë për të dhe fëmijët sepse bashkëshorti i saj në moshën 37-vjeçare ndërron jetë.

Elsa Tasha tregoi në studio edhe për konfliktet e vazhdueshme me familjen e bashkëshortit të ndjerë. Konfliktet mes tyre kanë qenë të pranishme edhe kur burri i saj ishte gjallë dhe ato u bënë shkak që ata të merrnin vendimin që të largoheshin nga shtëpia e tyre në Dibër dhe të merrnin shtëpi me qera në Durrës.

Pavarësisht se vjehrri ia la shtëpinë me testament burrit të saj, vjehrra dhe kunati nuk e lejojnë të hyjë brenda. Sipas saj, ata e kanë kërcënuar dhe kanë ushtruar dhunë fizike ndaj saj dhe fëmijëve.

Në një lidhje telefonike në studio, kunati i saj Neki Tasha u shpreh se ai nuk ka lidhje, por është nëna e tij, ajo që nuk pranon që Elsa të kthehet në shtëpi.

Mirela Milori: Shtëpia e cila i përket me testament, e lejoni zonjën Elsa dhe fëmijët e saj që të hyjnë në shtëpinë që i ka lënë vjehrri, babai juaj?

Neki Tasha: Ajo s’ka ndenjur fare, ajo iku.

Elsa Tasha: Kam ikur bashkë me burrin, nuk kam ikur mbas vdekjes, kam ikur një muaj përpara.

Neki Tasha: Burri vdiq përpara, ajo iku mbrapa.

Elsa Tasha: Burri ka ikur në muajin Prill, unë kam ikur në Maj.

Neki Tasha: E di unë, nuk e dini ju. Kur vdiq vëllai iku ajo.

Mirela Milori: Por me ligj nëse testamentin ia ka lënë vjehrri, me ligj ajo pronë që i takonte vëllait tuaj, automatikissht i kalon bashkëshortes dhe fëmijëve të tij. Pra nuk ka rëndësi se kur ka ikur Elsa nga shtëpia.

Neki Tasha: Sikur të jetë ligji, më vjen keq. Le të veptojë ligji.

Mirela Milori: Ky është ligji!

Neki Tasha: E kam nënën gjallë unë këtu.

Mirela Milori: Ju e lejoni të vijë në shtëpi?

Neki Tasha: Oj zonjë, unë kam nënën gjallë.

Mirela Milori: Po aty ku është dhe nëna të vijnë dhe këta. E lejoni ju të vijë, për pushime në verë ose në dimër?

Elsa Tasha: Jo dua të rikthehem të jetoj atje!

Neki Tasha: Ajo ka ikur.

Mirela Milori: Zonja ngre pretendimin që nuk e keni lejuar, madje e keni dhunuar. Është e vërtetë çfarë thotë Elsa apo gënjen Elsa?

Neki Tasha: Nuk është e vërtetë, nuk e lejon nëna, jo unë.

Mirela Milori: Ti mund të ndikosh tek nëna që Elsa të hyjë në shtëpi. Mund të gjendet gjuha për këtë?

Neki Tasha: I kam thënë, por nuk dëgjon, vetëm kur të vdes unë thotë po.

Mirela Milori: Keni ushtruar dhunë ndaj Elsës dhe fëmijëve të Elsës? Është ushtruar dhunë fizike nga ju, nëna juaj dhe fëmijët tuaj ndaj Elsës?

Neki Tasha: Në asnjë mënyrë!/tvklan.al