Cikloni në Detin Jon, Drejtoria Detare paralajmëron përkeqësim të motit

Edhe pse krijimi i ciklonit në ujërat e detit Jon nuk përbën rrezik serioz për Shqipërinë, Drejtoria e Përgjithshme Detare ka dalë me një paralajmërin për ditët në vazhdim.

Ata i kujtojnë anijet që të bëjnë kujdes dhe të marrin masat e nevojshme për të parandaluar çdo rrezik që vjen për shkak të kushteve të këqija të motit.

Postimi i Plotë

Si rezultat i krijimit të një cikloni, me erëra të fuqishme dhe reshje shiu, nga mbrëmja e datës 16 shtator deri më 19 shtator 2020 moti në zonën e Detit Jon në veri do të përkeqësohet.

Moti i përkeqësuar në jug të Italisë do të vazhdojë në drejtim të lindjes më konkretisht në zonën e Greqisë. Këto zona do të përfshihen nga era me shpejtësi deri në 60 milje në orë ku lartësia e dallgës së detit arrin në 5.5 metra dhe periudha 8 sek. Ditën e premte dhe të shtunë vendi ynë do të përfshihet nga era me drejtim veri, veri-perëndim, veri-lindje.

Me qëllim parandalimin e çdo situate të papritur për shkak të kushteve atmosferike kërkojmë bashkëpunimin e të gjithë subjekteve që ushtrojnë veprimtari në fushën e detarisë dhe që udhëtojnë në destinacion zonën e detit Jon i Veriut, më konkretisht në zonën e Italisë së Jugut dhe Greqisë, duhet të marrin të gjitha masat e nevojshme për të qënë të sigurt dhe parandaluar çdo rrezik të mundshëm për shkak të kushteve të përkeqësuara të motit.