Berisha bën deklaratën e fortë: Ligjet e Ramës do t’i kishte zili edhe Kim Jungu

Ish-kryeministri Sali Berisha tha se qeveria ka propozuar ligje “që i ka zili Kim Jungu për shkeljen e karantinës”, referuar ndryshimeve të propozura në Kodin penal.

Në një lidhje me Skype për “Zonë e Lirë”, Berisha tha se do të duhej të bëheshin ligje lufte, “duhej të dënoheshin ata që vjedhin, që janë lëshuar si lukuni duke bërë tendera sekrete”.

“Sot propozohen ligje që i ka zili Kim Jungu për shkeljen e karantinës, po nuk propozohet një ligj për ata që po përdorin epideminë për te vjedhur, për t’u pasuruar me paratë e taksapaguesve.

Po të jetë puna për ligj lufte, jo ai që e shkel karantinën, mirë nuk bën, por i trajton sikur të kishte dalë nga hunda e Enver Hoxhës, me 15 vite burg.

Por ai që vjedh meriton 35 apo deri në 60 vite burg. Cili qeveritar nuk po vjedh? Këta janë lëshuar si lukuni duke bërë tendera sekrete.

Po të ishte puna, për të bërë ligje special me të drejtë sociale, bëhen së pari për këtë kategori. 5 ditë më parë, më vjen një sms që më thotë se në spital, te Infektivi, nuk kemi ujë 48 orë, nuk kemi sapunë, banjot kanë shkuar në një gjendje skandal, kemi uri, unë nuk e publikova se nuk e besova, por i kërkoj falje.

Ata njerëz më së shumti kanë nevojë për imunitet dhe nëse t’i i ve në uri, ja shkatërron atë. Kjo është mesjetë, spitali nuk ka pasur kurrë uri”, -tha Berisha.