A do t’a godasë stuhia “Ciara” Shqipërinë? Ja çfarë pritet të ndodhë nesër (FOTO LAJM)

Nga stuhia e fortë e quajtuar ‘Ciara’ që ka goditur Britaninë e Madhe më 9 shkurt, kanë mbetur të vdekur 6 persona, ndërsa dëmet materiale në vend janë të mëdha. Mësohet që stuhia e fortë ka përfshirë edhe Gjermaninë, Francën, Belgjikën, Hollandën.

Gjithsesi, frika ekziston edhe për vendin tonë, sepse sipas ekspertëve, është mësuar se të premten e 14 shkurtit pritet që stuhia e fuqishme ‘Ciara’ të godasë edhe Shqipërinë.

Sinoptikania Adiola Bani, e ftuar në studion e lajmeve në “Ora News”, ka deklaruar se vendi ynë do të mbetet në periferi të kësaj stuhie, dhe ajo që paraqitet problematike do të jetë dita e nesërme. Sipas saj, do të kemi ardhjen e një sistemi vranësirash që sot gjatë natës, duke sjellë reshje të pakta në pjesën më të madhe të territorit dhe nesër gjatë mesditës, do kemi reshje mesatare dhe lokalisht intesive.

“Kjo stuhi ka qenë shumë problematike për Kontinentin Europian. Por vendi ynë do të mbetet në periferi të kësaj stuhie dhe ajo që paraqitet problematike do të jetë dita e nesërme. Ku do të kemi ardhjen e një sistemi vranësirash që sonte gjatë natës, duke sjellë reshje të pakta në pjesën më të madhe të territorit dhe nesër gjatë mesditës do kemi reshje mesatare dhe lokalisht intesive. Reshjet më të dendura do jenë në zonat veriore dhe zonat verilindore të vendit.

Përsa i përket erës që shkakton dëmet më të mëdha të shoqëruar me shi, do të jetë problematike vetëm në brigjet detare, sonte gjatë natës deri nesër në mesditë me shpejtësi 65-70 km/h.

Duke filluar që nga mesdita e nesërme, do të kemi rënie të intensitetit të erës dhe përmirësim të kushteve të motit. Puna në port nuk do pezullohet, sepse për t’u pezulluar era duhet të jetë më e fortë.

Duke qenë se kemi vranësira dhe reshje në gjithë territorin, sigurisht që presim edhe rënien e temperaturave. Më i ndjeshëm do jetë gjatë mesditës së nesërme me të paktën tre gradë, kryesisht në territorin verilindor të Shqipërisë.

Ditën e shtunë duke qenë se do ketë edhe diell, do na sjellë një rritje graduale të vlerave termike nga dita në ditë, duke patur kështu temperaturë normale për muajin shkurt”, shprehet Adiola Bani.